Almatyda «Halyq qatysatyn búdjet» baǵdarlamasy boıynsha qaraýsyz qalǵan bos jer zamanaýı jaıaý júrginshiler aımaǵyna aınaldy
Almatyda Túrksib aýdanyndaǵy Baıron kóshesi, 134b mekenjaıdaǵy jańa qoǵamdyq keńistikti abattandyrý aıaqtaldy. Qaraýsyz qalǵan bos jerdi zamanaýı jaıaý júrginshiler aımaǵyna aınaldyrý jónindegi jumystar «Halyq qatysatyn Búdjet» baǵdarlamasy aıasynda oryndaldy, dep habarlaıdy aqshamnews.kz.
Aýmaǵy 0,3 ga bolatyn jańa qoǵamdyq aımaq 2024 jyldyń 25 qarashasynda tórt aılyq qurylys jumystarynan keıin ashyldy.
Jobaǵa 80 metr trotýar salý, 500 sharshy metr tósenish tóseý, 155 metr qorshaý ornatý, 450 sharshy metr fýtbol alańyn jaılastyrý, balalar men sport keshenderin qurý, sondaı-aq ıtterdi serýendetýge arnalǵan alań kirdi.
Almaty ákimi Erbolat Dosaev jumys sapary jáne aýdan turǵyndarymen kezdesý barysynda daıyn nysandy aralady.
«Bul joba biz úshin naǵyz syılyq boldy. Munda biz demalamyz, sportpen shuǵyldanamyz jáne balalarmen ýaqyt ótkizemiz. Biz aýmaǵymyzdy abattandyrýdy ótingen edik, sózimiz estildi. Biz óz aýdanymyzdy damytýǵa jáne jaıly ómir súrý jaǵdaılaryn jasaýǵa qatysa alǵanymyzǵa qýanyshtymyz», - dedi jergilikti turǵyn.
Qala basshysy qala turǵyndarynyń ómir súrý sapasyn jaqsartý úshin osyndaı jobalardy iske asyrýdyń mańyzdylyǵyn atap ótti.
«Biz kez-kelgen bos keńistikti ózgertýge tyrysamyz, tipti turǵyndarǵa úıleriniń janynda demalýǵa múmkindik beretin shaǵyn aýmaqtardy da paıdalanamyz. Bul alań aýdan turǵyndary úshin tartymdy orynǵa aınalady dep senemin», - dedi Erbolat Dosaev.
Sondaı-aq, turǵyndardyń ótinishi boıynsha qala basshysy aýdan ákimine jańa alańnyń perımetri boıynsha beınebaqylaý kamerasyn ornatýdy tapsyrdy.
Aıta keteıik, megapolıste «Halyq qatysan búdjet» baǵdarlamasy belsendi júzege asyrylýda. Aǵymdaǵy jyly jobaǵa 18,8 mlrd teńge bólindi, bul ótken jylmen salystyrǵanda 5,8 mlrd teńgege artyq. Almatylyqtar aýlalardy, qoǵamdyq keńistikterdi abattandyrý, sport jáne oıyn alańdaryn qurý boıynsha 364 jobany usynýǵa jáne iske asyrýǵa múmkindik aldy.
