Sońǵy jyldardaǵy iri tótenshe jaǵdaılar azamattyq qoǵamnyń, atap aıtqanda, eriktiler men volontórlerdiń tótenshe jaǵdaılardyń aldyn alý jáne saldaryn joıý júıesindegi róliniń mańyzdylyǵyn aıqyn kórsetti, dep habarlaıdy aqshamnews.kz
Búgingi tańda Tótenshe jaǵdaılar mınıstrligi 47 myńǵa jýyq eriktini biriktiretin 136 volontórlik uıymmen ózara yntymaqtastyq ornatqan.
Eriktiler kásibı qutqarýshylar men órt sóndirýshiler úshin naqty kómekke aınalýda. Bul ásirese jastar arasynda ózekti, sebebi volontórlik uıymdar bolashaqtaǵy TJ salasynyń kadrlyq rezervin qalyptastyrady. Mınıstrlik volontórlik uıymdarmen birlesip, jumys baǵytyn úsh negizgi sala boıynsha uıymdastyrady: tabıǵı apattardan zardap shekkenderge kómek kórsetý (gýmanıtarlyq qoldaý qosa alǵanda), tótenshe jaǵdaılardyń aldyn alý jáne saldaryn joıýǵa qatysý, sondaı-aq habar-osharsyz ketken azamattardy izdeý-qutqarý jumystaryna qatysý.
Mınıstrlik salalyq volontórlikti belsendi túrde damytyp keledi. Bul baǵyttaǵy jarqyn mysal TJ salasyndaǵy eriktilerdiń alǵashqy respýblıkalyq forýmy, ol oqý-jattyǵý polıgony bazasynda ótkizildi. Sonymen qatar, TJM volontórlik týraly tájirıbesin halyqaralyq eriktiler forýmynda «TJ salasyndaǵy volontórlik» taqyrybyndaǵy paneldik sesıa aıasynda usyndy.
2024 jyly Qostanaı oblysynda mobıldi erikti toptardy qurý boıynsha pılottyq joba iske qosyldy. Bul toptar TJM-niń kásibı avarıalyq-qutqarý bólimshelerine uqsas túrde arnaıy daıyndyqtan ótti, oǵan fızıkalyq daıarlyq ta kirdi. Bıyldan bastap mundaı toptar elimizdiń árbir óńirinde quryla bastaıdy. Bul eriktiler jumysynyń júıeli bolýyn qamtamasyz etip, tótenshe jaǵdaılar kezinde beıbereket volontórliktiń aldyn alýǵa múmkindik beredi.
Atalǵan joba 2024 jyly Astana qalasynda ótken Azıadaǵy ózara is-qımyl jáne senim sharalary jónindegi keńes (AÓSSHK) janyndaǵy Jastar keńesiniń sheńberinde uıymdastyrylǵan volontórlik qozǵalystar kóshbasshylarynyń sletinde tanystyrylyp, 2024–2026 jyldarǵa arnalǵan volontórlikti damytý jáne qoldaý jónindegi Jol kartasyna engizildi.
Eriktilerdiń iri tótenshe jaǵdaılar kezinde, atap aıtqanda, 2024 jylǵy sý tasqyny kezinde jáne Qostanaı men Abaı oblystaryndaǵy iri orman órtterin sóndirý kezinde kómek kórsetýi erekshe atap óterlik jaǵdaı. Olardyń qatysýy zardap shekkenderge jedel kómek kórsetip, saldardyń joıylýyna eleýli úles qosty.
TJM eriktiler qozǵalysyna aqparattyq qoldaý kórsetýdi de jolǵa qoıǵan. Mınıstrliktiń resmı saıtynda volontórlikke arnalǵan bólim jumys isteıdi: onda tirkeýden ótýge, normatıvtik qujattarmen tanysýǵa jáne ózekti aqparat alýǵa bolady. Budan bólek, jyl saıyn shamamen 2 myń volontórlik uıymdardyń jetekshileri men úılestirýshileri oqýdan ótedi.
Eriktiler naqty tájirıbelik jumystarǵa da belsendi tartylady. Olar izdeý-qutqarý jumystaryna, shomylý maýsymy, órt qaýipti jáne jylytý kezeńderindegi aldyn alý sharalaryna, sondaı-aq TJM uıymdastyratyn túrli áleýmettik aksıalar men is-sharalarǵa qatysady.
Qazaqstan Respýblıkasynyń Prezıdenti atap ótkendeı, memlekettik organdar volontórlerdiń áleýetin tıimdi paıdalaný baǵytynda belsendi jumys júrgizýi qajet. Osyǵan oraı, Tótenshe jaǵdaılar mınıstrligi volontórlik uıymdarmen ózara is-qımyldy nyǵaıtyp, tótenshe jaǵdaılardyń aldyn alý men saldaryn azaıtýǵa baǵyttalǵan áriptestikti odan ári damytatyn bolady.