Tótenshe jaǵdaılar mınıstri general-maıor Shyńǵys Árinov Úkimet otyrysynda eldegi órt jáne ónerkásiptik qaýipsizdikti qamtamasyz etý salasyndaǵy aǵymdaǵy jaǵdaıdy, sondaı-aq óndiristegi qyzmetkerlerdiń jaraqattanýy men qaza bolý deńgeıin azaıtý jónindegi sharalary týraly baıandama jasady.
Bıylǵy jyldyń basynan bastap nysandarda 16 myńǵa jýyq tekserý (15 996) júrgizildi, olardyń nátıjesinde 105 myńnan astam buzýshylyq anyqtaldy, dep habarlaıdy aqshamnews.kz.
Ómir men densaýlyqqa qaýip tóndiretin óreskel buzýshylyqtar úshin 7 957 nysannyń qyzmeti toqtatyldy, onyń 95%-y órt qaýipsizdigi salasy boıynsha.
Mınıstr negizgi buzýshylyqtar órt avtomatıkasy júıeleriniń bolmaýy nemese durys jumys istemeýi, oqytylmaǵan qyzmetkerlerdi jumysqa jiberý, sondaı-aq evakýasıalyq shyǵýlardyń bitelýi ekenin atap ótti.
Ónerkásiptik qaýipsizdik salasyna da basa nazar aýdaryldy. Mundaı buzýshylyqtarǵa baılanysty jumysty toqtata turý sany ótken jylmen salystyrǵanda 4,5 ese ósti (92-den 418-ge deıin). Tek qańtardan mamyrǵa deıin 11 avarıa jáne 60-tan astam oqıǵa tirkeldi, saldarynan 22 qyzmetker zardap shekti, 15 adam qaza tapty. Jazataıym oqıǵalardyń negizgi sebepteriniń biri tehnıkalyq jabdyqtyń tozýynyń joǵary dárejesi bolyp qala beredi.
Osy máseleni júıeli sheshý úshin Mınıstrlik qaýipti óndiristik obektiler ıeleriniń vedomstvomen kelisýge jatatyn jańartý men tehnıkalyq qaıta jaraqtandyrýdyń jıyntyq josparyn jasaý mindetin zańnamalyq turǵydan bekitýge bastamashylyq jasady. Tıisti zań jobasy Parlament Senatynda qaralýda.
Qosymsha árbir qaýipti óndiristik obektide óndiristik baqylaýdyń derbes qyzmeti qurylatyn bolady. Mınıstrlik osyǵan baılanysty normatıvter ázirleıdi, bul jergilikti jerlerde baqylaýdy kúsheıtýge múmkindik beredi.
Memleket basshysynyń tapsyrmasy sheńberinde sıfrlyq júıelerdi engizýdi qosa alǵanda, ónerkásiptik qaýipsizdik salasyndaǵy sharalardy damytý jospary iske asyrylýda. Qaraǵandy oblysynda pılottyq rejımde kenshilerdi pozısıalaý jáne gazdaný monıtorıńi júıeleri testileýden ótýde, bul TJ-ǵa jedel den qoıýǵa múmkindik beredi.
Mınıstr sózin qorytyndylaı kele, Mınıstrlik budan bylaı da zamanaýı tásilderdi engizip, qadaǵalaýdy kúsheıte otyryp, óndiristik jaraqattanýdy jáne jumyskerlerdiń qaza bolýyn azaıtý jónindegi memlekettik saıasatty dáıekti túrde iske asyratynyn atap ótti.