TJD qutqarýshylary almatylyqtarǵa merekelik kúnder qarsańynda pırotehnıkalyq buıymdardy paıdalaný boıynsha qaýipsizdik sharalaryn eske saldy
Pırotehnıkalyq buıymdar Jańa jyl merekesiniń ajyramas bóligi. Almatylyq qutqarýshylar ÓKQ brıfıńinde pırotehnıkalyq zattardy qoldaný kezinde qaýipsizdikti saqtaý jáne órt jaǵdaılaryn aldyn alý boıynsha keńesterimen bólisti.
Almaty qalasy Tótenshe jaǵdaılar departamentiniń Memlekettik órt baqylaý basqarmasynyń bastyǵy Danıar Júsipov aıtýynsha, qalada jyl saıyn jańa jyldyq mereke kúnderi orta eseppen 13 órt oqıǵasy oryn alady. Bul rette órt oqıǵalarynyń 20%-ǵa jýyǵy pırotehnıkalyq buıymdardy durys paıdalanbaý saldarynan bolady. Máselen, sońǵy 5 jylda 67 órt oqıǵasy oryn alsa, onyń 9-y pırotehnıka saldarynan bolǵan.
«Jańa jyldy merekeleý qarsańynda pırotehnıkalyq buıymdarmen abaısyz áreket etý saldarynan jaraqat alý jaǵdaılary oryn alýda. Osylaısha, bıylǵy jańa jyl kúni ártúrli jaraqattarmen 13 adam, onyń ishinde 3 bala, medısınalyq mekemelerge júgindi. Jalpy, sońǵy 5 jylda 47 adam zardap shekkender bolsa, onyń ishinde 25-i balalar», - dep atap ótti D. Júsipov.
Órtterdiń aldyn alý jáne eskertý, sondaı-aq pırotehnıkalyq buıymdardy durys paıdalanbaý saldarynan bolatyn jazataıym oqıǵalardy boldyrmaý maqsatynda Almaty qalasy TJD azamattardyń qaýipsizdigin qamtamasyz etýge baǵyttalǵan uıymdastyrý sharalaryn júrgizýde.
«Pırotehnıkalyq buıymdardy paıdalaný saldarynan bolǵan qaıǵyly oqıǵalardy boldyrmaý maqsatynda jyl saıyn jeltoqsan aıynyń úshinshi onkúndiginen bastap Departamenttiń ınjenerlik-ınspektorlyq quramy polısıa departamenti, ákimdik, prokýratýra ókilderi jáne BAQmen birlesip pırotehnıka buıymdary satylatyn oryndarda reıdter júrgizedi. Birlesken reıdtik is-sharalardyń nátıjesinde, polısıa qyzmetkerleri sertıfıkattalmaǵan kontrafaktilik pırotehnıkalyq ónimderdi anyqtaǵan jaǵdaıda ákimshilik sharalar, sonymen qatar keıinnen ónimderdi tárkileýmen prosesýaldyq sheshim qabyldaýǵa baǵyttalǵan is-áreketter qoldanady», - dep atap ótti spıker.
Qutqarýshylar pırotehnıkalyq buıymdardy tek mamandandyrylǵan dúkenderde satyp alý kerektigin eske saldy. Bul rette, buıym qaptamasynyń myjylmaǵan nemese deformasıalanbaǵanyna, sondaı-aq jaramdylyq merzimine nazar aýdarý qajettigin eskertti. Pırotehnıkalyq quraldardy qurǵaq orynda, jylý kózderinen alys jerde saqtaý kerek.
Pırotehnıkalyq zattardy paıdalaný kezinde qaýipsizdik nusqaýlaryn oryndaý mańyzdy, atap aıtqanda:
- balalardyń óz betimen raketalar men petardalardy qosýyna jol bermeńiz;
- qaýipti aımaq (50 metr) radıýsynda pırotehnıkany qosýǵa kedergi bolatyn eshteńe joǵyna kóz jetkizińiz;
- pırotehnıkany tutatý kezinde eshqashan qoraptyń ústine eńkeımeńiz;
- fıtıldi tutatý kezinde qol sozym aralyǵyndaı oryn qaldyryńyz;
- ónimdi qatty jel kezinde qospańyz;
- pırotehnıkany eger ol iske qosylmaǵan bolsa, qaıta qosýǵa tyryspańyz;
- raketalar men feıerverkterdi adamdar men janýarlarǵa qaratpańyz, hlopýshkalardy aıaq astyna tastamańyz;
- feıerverkterdi qosý alańy men turǵyn úılerge deıingi eń az qashyqtyq 50 metr bolýy kerek. Alańda aǵashtar, elektr jelileri jáne basqa da kedergiler bolmaýy kerek, bul otshashýlar baǵytyn ózgerte alady.
Sondaı-aq, órt qaýipsizdigi maqsatynda jańa jyldyq shyrsha men áshekeılerin ornatý kezinde aǵashtardy turaqty negizge ornatý jáne úı-jaılardan shyǵatyn joldardyń ashyq bolýy usynylady. Sonymen qatar, myna sharalardy eskerý qajet:
- shyrsha butaqtary qabyrǵalar men tóbeden keminde 1 metr qashyqtyqta ornalasýy kerek;
- jaryq gırlándtaryn qosý aldynda uzaq ýaqyt paıdalaný kezinde ylǵalǵa tózimdiligin anyqtaı otyryp, elektr jelisiniń qýat júktemeleriniń naqty esebin jasaý qajet;
- eger jaryqtandyrý kezinde aqaý anyqtalsa (symdardyń qyzýy, ushqyn shyǵýy), ol dereý toktan ajyratylýy tıis.
Sonymen qatar, qoǵamdyq oryndarda (korporatıvtik keshter jáne t.b.) jańa jyldyq is-sharalardy ótkizý kezinde kelesi órt qaýipsizdigi erejelerin saqtaý qajet:
- kem degende eki avarıalyq shyǵýmen qamtamasyz etilgen úı-jaılar ǵana paıdalanylady, shyǵý joldary óz kezeginde únemi ashyq bolýy;
- is-sharalar ótkiziletin úı-jaılar bastapqy órt sóndirý quraldarymen qamtamasyz etilýi;
- is-sharalar kezinde sahna jáne zaldarda órt qaýipsizdigine jaýapty tulǵalardyń kezekshilikte bolýy;
- kezekshiler órt qaýipsizdigi boıynsha oqytýdan ótýi tıis.
Ruqsat etilmeıtin jaǵdaılar:
- is-sharalar ótkiziletin úı-jaılardyń terezelerinde temir torlardyń bolýy;
- qatarlar arasyndaǵy ótý jolynyń enin qysqartýǵa jáne ótý joldarynda qosymsha kreslolar, oryndyqtar qoıýǵa;
- qoıylym kezinde bólmedegi jaryqty tolyǵymen óshirý;
- qoldan jasalǵan elektr gırlándtaryn qoldaný;
- úı-jaılarda pırotehnıkalyq buıymdardy paıdalanýǵa qatań tyıym salynady.