Almatylyq dáriger pırotehnıkalyq buıymdardan jaraqat alǵan jaǵdaıda qandaı alǵashqy kómek kórsetý kerektigin aıtty, dep habarlaıdy Almaty-akshamy.kz
Almaty qalasy ÓKQ brıfıńinde sóz sóılegen Ortalyq qalalyq klınıkalyq aýrýhananyń travmatology Osman Kadyrov kez-kelgen pırotehnıkalyq buıymnyń órt shyǵý nemese jaraqat alý qaýpi bar ekenin atap ótti. Dáriger pırotehnıkalyq buıymdardy qoldaný kezinde jaraqat alǵan jaǵdaıda alǵashqy medısınalyq kómek kórsetý boıynsha usynystarymen bólisti.
«Petarda, otshashýlar men shaǵyn zymyrandar ádemi biraq qaýipti kórinis. Kez-kelgen pırotehnıkalyq buıymnan órt shyǵý nemese jaraqat alý múmkindigi bar. Osyndaı jaraqat túrine shaldyqqan naýqastarǵa kómek kórsetý tájirıbesine súıene otyryp, azamattarymyzǵa eskertip, biraz usynystar aıtqym keledi», – dedi O. Kadyrov.
Jazataıym oqıǵa oryn alǵanda, dáriger kelgenge deıin kelesi áreketterdi oryndaý kerek:
- kózge bógde bólshekter tússe (eger oqıǵa úıde bolsa), kózdiń shyryshty qabyǵyn bólme temperatýrasyndaǵy qaınaǵan sýmen kóp mólsherde shaıyp, kózge tańǵysh qoıý kerek;
- eger jazataıym oqıǵa dalada oryn alsa, qolda bar quraldardy (oramal, shúberek) qoldanyp, kózge taǵý jetkilikti. Olar bolmasa, qalpaqty kózińizge tartýǵa nemese qolmen jabýǵa bolady.
- shuǵyl medısınalyq kómekke júginý.
Terige jarylys bólshekteriniń túsýimen termıalyq kúıik bolǵan jaǵdaıda:
- eger jazataıym oqıǵa úıde bolsa, terini aǵyndy sýmen shaıý jáne qurǵaq aseptıkalyq tańǵyshty qoldaný qajet. Eger jazataıym oqıǵa dalada oryn alsa qolda bar materıaldardy paıdalanyp tańý kerek (taza oramal ne shúberek);
- maıly tańǵyshtardy qoldaný, terini araqpen, odekolonmen, untaqtar sebý jáne maqta qoldaný usynylmaıdy;
- jaqyn jerdegi travmatologıa ortalyǵyna júginip, kómek surańyz.
«Teri zaqymdanýy oryn alǵan jaǵdaıda (eger oqıǵa úıde bolǵan bolsa) onda aseptıkalyq tańǵyshty qoldaný qajet. Jazataıym oqıǵa kóshede oryn alsa, qolda bar materıaldardy (taza oramal, taza shúberek) paıdalanyp tańǵysh qoıý kerek. Qan ketýmen júretin ashyq jaralar bolsa, tańǵysh tańyp, jedel járdem shaqyrý kerek», - dep keńes berdi dáriger.
Sondaı-aq spıker Almaty qalasynda №4 QKA, №7 QKA, QJSHKKA, OQKA, BJMJO jáne №2 BQKA kópsalaly stasıonarlarynda travmatologıalyq pýnktterdiń táýlik boıy jumys isteıtinin eske saldy.