Batys Qazaqstandaǵy tikushaq apatynyń hronologıasy belgili boldy.
Tótenshe jaǵdaılar mınıstrliginiń resmı ókili Rýslan Imanqulovtyń habarlaýynsha, tikushaq keshe saǵat tańǵy 10:40-ta Atyraýdan ushyp shyqqan. «Qaztransoıl» kompanıasynyń tapsyrysymen kókke kóterilgen MI-8 munaı qubyrlaryn áýeden barlap júrgende, Oral qalasynan 54 shaqyrymdaı aýmaqta apatqa ushyraǵan. Oqys oqıǵa jaıly habar ortalyqqa 15:48-de túsken, dep habarlaıdy Almaty-akshamy.kz.
Alǵashynda «bortta bolǵan 6 adam tiri» dep aqparat tarady. Óıtkeni jaralanǵandardyń biri dıspecherge «ózgeler de aman» dep habarlaǵan. Alaıda, 4 adamnyń qaza tapqany belgili boldy. Taǵy 2-eýi jaralanǵan. Tikushaq zaýyttan 2021 jyly shyǵarylǵan. Ótken aıda júrgizilgen tehnıkalyq tekserý kezinde eshqandaı aqaý anyqtalmapty. Qazir qylmystyq is qozǵaldy. Arnaıy komısıa qurylyp, Kóliktegi polısıa departamenti apattyń sebebin anyqtap jatyr. Tergeýdi Bas kólik prokýratýrasy qadaǵalaıdy. Tikushaqty qurastyrǵan reseılik zaýyttyń ókilderi de apat ornyna baryp, oqys oqıǵanyń sebebin anyqtaýǵa kómektespek. Al qaza bolǵan ekıpaj músheleriniń otbasyna ótemaqy tólenedi. Balalaryna kámelet jasyna tolǵansha járdemaqy berilmek.
«Aıta ketý kerek, ekıpajda óte bilikti, tájirıbeli mamandar boldy. Olardyń áýede ushý saǵattary da az emes. Árqaısynyń avıaqutqarý salasyndaǵy eńbek ótili 10 jyldan kem emes. Al árqaısynyń jalpy eńbek ótili, jumys tájirıbeleri 30 jyldan asady», - dedi QR Tótenshe jaǵdaılar mınıstrliginiń resmı ókili Rýslan Imanqulov.