Elsiz er bolmaıdy, jurtsyz jigit bolmaıdy.
Keshe Qazaqstan Respýblıkasy İİM M.Esbolatov atyndaǵy Almaty akademıasynda Keńes Odaǵynyń batyry Baýyrjan Momyshuly atyndaǵy zamanaýı ınteraktıvti dáris zaly ashyldy.
«Halqymyz Baýyrjandaı batyr ulyn qansha madaqtasa da, artyq bolmaıdy. Baýyrjan Momyshulynyń dáris zalynyń Almaty akademıasynda ashylýynyń eki sebebi bar. Birinshiden, Baýkeń óziniń erlik ǵumyrynyń bir kezeńinde ishki ister organdarynda qyzmet atqarǵan. Ekinshiden, kezinde qazirgi Almaty akademıasynyń tyńdaýshylarymen kezdesýler ótkizip, ishki ister organdarynyń bolashaq qyzmetkerlerine adal jumys isteýdi amanattaǵan tulǵa. Baýyrjan Momyshuly - biz úshin erliktiń, patrıotızmniń úlgisi. “Otan úshin otqa tússeń, kúımeısiń” dep batyr babamyzdyń ózi aıtqandaı, bul dáris zaly bolashaq polısıa qyzmetkerlerin erlikke úndep, Otandy Baýyrjansha súıýge baýlıtyn bolady. Memleket basshysynyń ishki ister organdarynyń aldyna qoıǵan basty mindetteriniń biri – kúndelikti polısıa qyzmetinde zamanaýı tehnologıalyq quraldardy keńinen qoldaný. Osyǵan oraı Baýyrjan Momyshuly atyndaǵy dáris zaly ınteraktıvti quraldarmen jabdyqtaldy», – dedi dáris zalynyń ashylý saltanatynda sóz sóılegen Akademıa basshysy A.Saıtbekov.
Qazaqtyń batyr ulyna arnalǵan dáris zalynyń ashylý saltanatyna halqymyzdyń uly tulǵalarynyń ómiri men eńbegin zertteýshi ǵalym Mekemtas Myrzahmetuly, QR İİM Kadr saıasaty departamentiniń basqarma basshysy Q.Toqybaev, Baýyrjan Momyshulynyń kelini, jazýshy Zeınep Ahmetova, Almaty qalasy PD bastyǵy Arystanǵanı Zapparov, Jambyl oblysy Jýaly aýdany ákiminiń orynbasary Anar Ahmetova qatysyp, batyr babamyzdyń ómiri men erligi jaıly sóz sóıledi.