Áıel adam – otbasynyń berekesi ǵana emes, el ıgiligine eńbek etken qaıratker de bola alady. Aınalamyzda kóptegen názikjandylar ómirdiń túrli salalarynda jetistikke jetip, aýyr jumystardy da er-azamattarmen qatar atqaryp keledi. Osyndaı jandardyń qatarynda apaly-sińlili Záýre men Gúlnar Jalǵasbaevalardy da atar edik. Olar Almaty qalasyn sapaly aýyzsýmen qamtamasyz etetin kúrdeli salada eńbek etip kele jatyr.
Qala turǵyndary úshin sý – kúndelikti qajettilik. Biraq onyń úzdiksiz ári sapaly jetkizilýiniń artynda úlken eńbek jatyr. Bul mindetti oryndaý – asa úlken jaýapkershilikti, qyraǵylyq pen biliktilikti qajet etedi. Osy salada jyldar boıy jumys istep kele jatqan Záýre pen Gúlnar – óz isiniń naǵyz mamandaryna aınalǵan.
Sý sapasyn baqylaımyz
Záýre Jalǵasbaeva – «Almaty Cý» MKK-niń «Batys» sýmen jabdyqtaý jáne sý burý bóliminde operator qyzmetin atqarady. Bul saladaǵy eńbek ótili 10 jyldan asady. Onyń negizgi mindeti – úsh mıllıonǵa jýyq turǵyny bar megapolısti taza aýyzsýmen qamtamasyz etý úshin sýdyń quramyndaǵy gıpohlorıd mólsherin turaqty deńgeıde ustap otyrý.
– Biz úsh táýlik saıyn aýysymmen jumys isteımiz. Tańerteń kelgende aldymen terıtorıany tekserip, kezekshiliktegi áriptesterimizden jumysty qabyldap alamyz. Sýdyń sapasyn muqıat baqylap, gıpohlorıd deńgeıin tekseremiz. Qala turǵyndarynyń densaýlyǵy men ómir sapasy bizdiń jumysymyzǵa tikeleı baılanysty bolǵandyqtan, bul iske óte jaýapkershilikpen qaraımyz, – deıdi Záýre apaı.
Ol saladaǵy bilikti mamandardyń biri, Omsk qalasyndaǵy aýyl sharýashylyq ınstıtýtyn bitirip, keıin Almatyǵa qonys aýdarǵan. Jubaıy Halmýdın Súleıov te «Almaty Cý» mekemesinde slesar bolyp jumys isteıdi.
– Jumysymyz jeńil emes. Túngi aýysymda da qyzmet etemiz, barlyq júıeni únemi baqylap otyrý qajet. Nasostar isten shyqpaýyn, jaryq óshpeýin qadaǵalaımyz. Kez kelgen aqaý týyndasa, birden dıspecherge jáne basshylyqqa habarlaımyz, – deıdi ol.
Záýresh apaıdyń ómirdegi eń úlken armany – balalary men nemereleriniń amandyǵy.
– Áıel baqyty – otbasynyń berekesi men urpaǵynyń amandyǵynda. Jumystan tys ýaqytta balalarym men nemerelerimniń qasynda bolǵan sátter – men úshin eń baqytty kezder. Sonymen qatar, Almaty halqyn sapaly aýyzsýmen qamtýǵa óz úlesimizdi qosyp júrsek, bul da úlken maqtanysh, – deıdi ol.
Ápkem – ómirlik tiregim
Záýreshtiń sińlisi Gúlnar bolsa osy salada 5 jyldan beri eńbek etip keledi. Qazir «Almaty Sý» mekemesinde sý qondyrǵysynyń mashınısi bolyp jumys isteıdi. Jaýapty mindeti – qaladaǵy nasos júıesiniń úzdiksiz jumysyn qamtamasyz etý.
– Jumys aldyndaǵy mindet – aýmaqtyń tazalyǵyn tekserý. Odan keıin nasostar men basqa da qondyrǵylardyń jumysyn qarap, olardyń qalypty jaǵdaıda ekenin anyqtaımyz. Bizdegi «Sentrabejnyı» qondyrǵysynda tórt nasos bar. Onyń ekeýi «Zapad» ýchaskesine, al qalǵan ekeýi Naýryzbaı aýdanyn sýmen qamtýǵa baǵyttalǵan, – deıdi Gúlnar óz jumysyn tanystyrǵanda.
Gúlnardyń jubaıy Ońtalap Toqmyrzaev – Qyzylorda oblysy, Qazaly aýdanynyń týmasy. Qazirgi ýaqytta ol Balqash aýdanynda jumys isteıdi.
– Ulym Aqnıet J.Elebekov atyndaǵy mýzyka kolejinde 2-kýrsta oqıdy. Árqashan sonyń tileýin, elimniń, jurtymnyń tileýin tileýmen otyram – deıdi Gúlnar.
Gúlnar úshin apasy Záýresh – ómirlik tirek. Bir ujymda eńbek etkendikten, bir-birine árdaıym qoldaý kórsetip, jumys barysyn da, ómirdegi máselelerdi de birge bólisip otyrady.
Sý – tirshilik kózi, al ony jetkizý – jaýapty is. Apaly-sińlili Záýre pen Gúlnar óz jumystaryna adal, kásibı mamandar. Olardyń arqasynda Almaty qalasynyń turǵyndary taza ári sapaly aýyzsý tutyna alady.
Sý salasy – úlken jaýapkershilikti talap etetin kúrdeli sala. Biraq bul jumysty názik júrekti, meıirimdi jandar da erlermen teń dárejede atqaryp keledi. Qyzdardyń qajyrly eńbegi – sonyń jarqyn dáleli.
Qala halqyn taza aýyzsýmen qamtamasyz etý jolynda aıanbaı ter tógip júrgen Záýre pen Gúlnardaı jandarǵa alǵysymyz sheksiz. 8 naýryz merekesi qarsańynda Sizderge ár kúnińiz kóktemdeı jyly, gúldeı ásem, kúndeı jarqyn bolsyn dep tilek aıtamyz.
• Kerek derek
• «Almaty Sý» MKK-iniń ınjenerıa, qarjy, sýmen jabdyqtaý jáne sapany baqylaý bólimderinde barlyǵy 1260 áıel jumys isteıdi.
• 2024 jylǵy derekterge súıensek, Qazaqstannyń sý salasynda 1700-den astam áıel jumys isteıdi. Atap aıtqanda, «Qazsýshar» memlekettik kásipornynda 1579 názikjandy arýlar qyzmet atqarady.
• Sý resýrstary jáne ırrıgasıa mınıstrliginde 75 áıel bar. Mınıstrlik janyndaǵy Sý sharýashylyǵy jáne baseındik ınspeksıalar komıtetinde 99 áıel jumys isteıdi.