Tirkeýge ótinish bergen úsh partıanyń qujattary keri qaıtaryldy. Bul týraly búgin Ádilet mınıstri Qanat Mýsın málimdedi, dep habarlaıdy Almaty-akshamy.kz.
Mınıstrdiń málimdeýine, ázirge bul birlestikter barlyq qajetti qujatyn tapsyrmaǵan. Ázirge partıalarǵa eski talaptar qoıylady. Iaǵnı uıymdastyrýshy topta myń adam, al múshe sany 20 myńnan kem bolmaýy tıis.
«Úsh partıany tirkeýge qujat tapsyrylyp jatyr. Olardyń arasynda «El tiregi», «Baıtaq» bar. Biraq olardyń qujattary birneshe ret qaıtarylǵan. Uıymdastyrý tobynyń ishinde ár adamnyń málimetteri kórsetilýi kerek. Keı jaǵdaıda adamdardyń JSN-i sáıkes kelmeıdi, al bir jaǵdaılarda ómirden ótken adamdar uıymdastyrý tobynyń tizimine kirgizilgen. Sondaı-aq basqa partıalardyń músheleri de kezdesip jatady. Bul kisiler zań boıynsha tizimnen shyǵarylýy kerek. Osy oraıda uıymdastyrý tobyndaǵy múshelerdiń sany tıisti mejege jetpeı qalyp jatady», - dedi Q. Mýsın Senatta tilshiler saýalyna jaýap bere otyryp.
Onyń aıtýynsha, atalǵan zańnamalyq talaptar oryndalmaǵan jaǵdaıda usynylǵan qujattar qaıtarylady.
«Bul óz kezeginde uıymdastyrýshylardyń jumysy men mindeti bolyp sanalady. Iaǵnı olar tizimderdi egjeı-tegjeıli tekserip, kemshilikterge jol bermeýi kerek. Eger olar qujattaryn durys tapsyrsa, mindetti túrde tirkeımiz. Qazir partıany tirkeý úshin uıymdastyrý tobynyń sany 1000 adamdy qamtýy kerek. Al partıanyń múshesi 20 myń bolýy tıis», - dedi mınıstr.