Egde jastaǵy er adam Ortalyq qalalyq klınıkalyq aýrýhanaǵa 7-shi jáne 9-shy omyrtqasy syndy degen kúdikpen túsken. Steroıdty osteoporozdan bolǵan synyq saldarynan pasıenttiń súıekteri syrqyrap, bulshyq eti aýyrǵan, dep habarlaıdy Almaty-akshamy.kz OQKA baspasóz qyzmetine silteme jasap.
Neırohırýrgıa bólimi meńgerýshisi Marat Almatovtyń aıtýynsha, patologıalyq synyq súıek tinindegi qurylymdyq ózgeristerge baılanysty paıda bolady. Saldarynan súıektiń tózimdiligi tómendep, bolmashy jaraqattyń ózi synyqqa ákep soqtyrýy múmkin. Jan-jaqty tekserilgennen keıin pasıenttiń omyrtqasyna vertebroplastıka jasaldy.
«Vertebroplastıka – omyrtqany «súıekke arnalǵan sementtiń» kómegimen ishten bekitýge múmkindik beretin operasıa. Shaǵyn ınvazıvti operasıa kezinde teriniń az ǵana bóligi kesiledi. Ota barysynda biz omyrtqaǵa ınemen medısınalyq sement saldyq. Prosedýra bastan-aıaq rentgen arqyly baqylandy. Bul kúrdeli ota, sebebi sementti omyrtqaǵa alty mınýttyń ishinde salyp bitirý qajet», - deıdi neırohırýrg Marat Almatov.
Jergilikti jansyzdandyrý arqyly jasalǵan operasıa 40 mınýtta aıaqtaldy. Qazir pasıenttiń jaǵdaıy jaqsy. Aldaǵy bir-eki táýlikte ol qalypty ómirge qaıta oralmaq.
«Vertebroplastıka – joǵary tehnologıalardyń kómegimen jasalatyn zamanaýı otanyń bir túri. Onyń quny 300 myńnan 1 mıllıon teńgege deıin jetýi múmkin. Joǵary tehnologıalyq qyzmettiń bul túri saqtandyrylǵan pasıentterge tegin jasalady», - deıdi Medısınalyq saqtandyrý qorynyń Almaty qalalyq fılıaly dırektory Tileýhan Ábildaev.