Til arqyly arandatýshylyqqa jol joq – mundaı áreketter zańmen qatań jazalanady
Qazaqstan Prezıdenti Qasym-Jomart Toqaev Qazaqstan halqy Assambleıasynyń HHHİV sesıasynda sóılegen sózinde til máselesin saıası quralǵa aınaldyryp, qoǵamda alaýyzdyq týǵyzýǵa tyrysatyn kez kelgen áreketke qatań túrde tosqaýyl qoıylatynyn málimdedi. Bul týraly Aqshamnews.kz saıty habarlaıdy.
Memleket basshysy azamattar arasynda tilge baılanysty qurmet pen túsinistik bolýy qajet ekenin atap ótti. Árkim óz oıyn erkin bildirýge quqyly bolǵanymen, bireýdi belgili bir tilde sóıleýge májbúrleýge bolmaıtynyn eskertti.
"Elimizde azamattar bir-birin nemese minberde sóılep turǵan adamdy ‘myna tilde sóıle’ dep májbúrlemeýge tıis", – dedi Toqaev.
Prezıdent til máselesin jeleý etip, qoǵamda iritki salýǵa baǵyttalǵan arandatýshylyq áreketterge jol berilmeıtinin jáne olardyń zań júzinde jaýapkershilikke tartylatynyn naqty aıtty.
"Til máselesin tý etip qoǵamda alaýyzdyq týǵyzǵysy keletin, el ishindegi jaǵdaıdy shıelenistirýge umtylatyn árbir áreketke tosqaýyl qoıylyp, zań júzinde jazalanady", – dedi Memleket basshysy.
Onyń aıtýynsha, mundaı áreketter tek el ishinde ǵana emes, shetelde otyryp, túrli uıymdardyń qarjylaı nemese aqparattyq tapsyrmalaryn oryndaıtyn destrýktıvti toptar tarapynan da oryn alýy múmkin.
"Bul rette úı ishindegi ǵana emes, shetelde otyryp áldebir uıymdardyń aqshasy men tapsyrmasyna destrýktıvti áreketpen aınalysatyn arandatýshylar týraly da aıtyp otyrmyz", – dep naqtylady Toqaev.