Qazaqstan Prezıdenti Qasym-Jomart Toqaev Qazaqstan halqy Assambleıasynyń HHHİV sesıasynda sóılegen sózinde konstrýktıvti syn men destrýktıvti arandatýdyń arajigin ajyratyp, memlekettiń ishki isterine syrtqy yqpal etý áreketterine qarsy naqty ustanymyn bildirdi. Bul týraly Aqshamnews.kz saıty habarlaıdy.
Prezıdent el ishinde sóz erkindigi men konstrýktıvti pikirtalastyń mańyzyn joqqa shyǵarmaı, sonymen qatar ony arandatý men qoǵamdyq turaqtylyqty buzý maqsatynda qoldanýǵa jol berilmeıtinin atap ótti.
"Kúrish pen kúrmekti, konstrýktıvti syn men dálelsiz min taǵýdy, kóńilge tımeıtin parodıa men jıirkenishti qorlaýdy aıyra bilý mańyzdy. Zań aldynda bári teń", – dedi Memleket basshysy.
Ol etnosaralyq kelisim men beıbitshilikke nuqsan keltiretin kez kelgen áreket zańmen qatań jazalanatynyn eskertti. Mundaı arandatý áreketterine qazirdiń ózinde tosqaýyl qoıylyp keledi jáne bul ustanym alda da saqtalady.
Toqaev ózin sóz bostandyǵynyń jaqtaýshysy retinde kórsetip júrgen keıbir blogerler men quqyq qorǵaýshylar shyn máninde syrtqy kúshterdiń múddesine qyzmet etip júrgenin málimdedi.
"Elimizdegi ár isten saıası, jaǵymsyz astar izdep, shyn máninde, arandatýmen aınalysyp júrgenin aıtpasqa bolmaıdy. Bul – Qazaqstannan kóship ketip, shetelde júrip halqymyzǵa shabýyl jasaıtyn, tipti memlekettik organdardy bopsalaıtyn burynǵy azamattarymyzdyń áreketi", – dedi Prezıdent.
Ol mundaı tulǵalardyń shet memleketterden alǵan qarjyny aqtaý maqsatynda áreket etip júrgenin atap ótti. "Búginde muny bári biledi. Demokratıany bireýdiń qarjysymen ornatýǵa bolmaıdy", – dedi Toqaev.