Qazaqstan Respýblıkasynyń Prezıdenti Qasym-Jomart Toqaev Qazaqstan halqy Assambleıasynyń HHHİV sesıasynda sóılegen sózinde Qazaqstanda eshqashan azamattardy ultyna, dinine nemese tiline qaraı kemsitýge jol berilmegenin jáne bolashaqta da berilmeıtinin qadap aıtty.
"Barsha azamattarǵa birdeı múmkindik berilgen. Bul – naǵyz ádildik, ádiletti memlekettiń ajyramas bóligi", – dedi Memleket basshysy.
Ol el birligi men tatýlyǵynyń memlekettik saıasattyń negizgi tuǵyry ekenin jáne bul strategıalyq baǵyttyń bolashaqta da saqtalatynyn atap ótti.
"Túrli etnos ókilderi bir shańyraqtyń astynda bir úıdiń balasyndaı tatý-tátti ómir súrip jatyr. Bul – maǵynasy tereń naqty jetistik", – dep túıindedi Toqaev.
Prezıdent óz sózinde memlekettik til – qazaq tiliniń qoldanys aıasynyń keńeıip kele jatqanyn naqty derektermen jetkizdi.
"Búginde túlekterdiń 80 paıyzy Ulttyq biryńǵaı testileýdi memlekettik tilde tapsyrady. Bıyl alǵash ret mektepke baratyn balalardyń 70 paıyzdan astamy qazaq tilinde oqıtyn bolady", – dedi ol.
Bul kórsetkishter til saıasatynyń nátıjeli júzege asyp jatqanyn jáne halyqtyń ana tiline degen senimi men suranysy artyp kele jatqanyn kórsetedi.