TikTok platformasy men Qazaqstannyń «Atameken» Ulttyq kásipkerler palatasy 2024 jyly #QazaqstandaJasalǵan baıqaýyn bastady. Bul bastama jergilikti kásipkerlerdi biriktirip, ózderiniń isteri men elimiz úshin mańyzdylyǵyn tanytýǵa múmkindik berdi, dep habarlaıdy aqshamnews.kz
Respýblıka aýmaǵyndaǵy kásipkerler óz tarıhtarymen bólisip, jobalar týraly vıdeolaryn baıqaý heshtegine salyp jarıalady. Bul vıdeolardan úzdikteri tórt nomınasıa boıynsha tańdaldy: «Áleýmettik bıznes», «Ekologıalyq kásipkerlik», «Jastar kásipkerligi» jáne «Bir aýyl – bir ónim». Ár nomınasıanyń jeńimpazdary Qazaqstan ekonomıkasyna qosqan úlesi úshin syılyq retinde iPhone 16 Plus alady. Endi jeńimpaz kásipkerlermen jaqynyraq tanysaıyq.
Áleýmettik bıznes
«Áleýmettik bıznes» nomınasıasynda jeńimpaz atanǵan Ekaterına Rýfftyń jobasy – «Amalıa» abılıtasıalyq ortalyǵy, ol damýynda qıyndyqtary bar balalarǵa arnalady. Abılıtasıa - balalardyń jańa daǵdylardy meńgerýine jáne kúndelikti ómirge beıimdelýine kómektesý. Ortalyq Astana, Almaty, Qaraǵandy jáne Qostanaı qalalarynda jumys isteıdi. Ekaterına óziniń vıdeolarynda áleýmettik bıznestiń balalardyń áleýetin ashýǵa, óz-ózine senimdilik qalyptastyrýǵa jáne qoǵamǵa sátti ıntegrasıalanýǵa qalaı kómektesetinin kórsetedi.
Ekologıalyq kásipkerlik
«Ekologıalyq kásipkerlik» nomınasıasynda Mańǵystaý oblysynyń turǵyny Nurkıa Beknıazova jeńiske jetti. Ol «ITprof servıs» kásipornynyń dırektory, kompanıa qaıta óńdeý úshin ekinshi rettik shıkizatty jınaý jáne suryptaýmen aınalysady. Bul joba ekologıany saqtaý men turaqty bıznes sheshimderin engizýge baǵyttalǵan. Kásiporyn Aktaý qalasynda qoqystardy suryptaý júıesin alǵashqylardyń biri bolyp engizgen. 8 jyl ishinde 10 000 tonnadan astam ekinshi rettik shıkizat jınalyp, qaıta óńdeýge jiberildi.
Jastar kásipkerligi
«Jastar kásipkerligi» nomınasıasynda 23 jastaǵy Jańaózen turǵyny Dúısenǵalı Nurjan jeńiske jetti. Onyń «Ozen Sabyn» mylyn shyǵarý jobasy jergilikti óndiristi damytýǵa baǵyttalǵan. TikTok platformasy onyń brendi men ónimin tanytýǵa, jańa klıentter tartýǵa kómektesýde. Nurjan óz jobasynyń tanymaldylyǵyn arttyryp qana qoımaı, basqa jastardy da óz bıznes bastamalaryn qurýǵa yntalandyrady.
Aýylsharýashylyq bıznes
«Bir aýyl – bir ónim» nomınasıasynyń jeńimpazy – Shyǵys Qazaqstan oblysyndaǵy Bystrýha aýylynyń turǵyny Polına Troeglazova. Polına omartashy. Bul kásipti jalǵaýshy tórtinshi urpaq. Atasynan alǵan tájirıbeni jalǵastyrýda. Onyń jobasy aýyldyq bıznesti qoldaýǵa jáne jergilikti ónimderdi ilgeriletýge baǵyttalǵan. Polına tabıǵı bal negizinde erekshe ónimder jasaıdy, onyń ishinde kedr jańǵaǵy men ıtmuryn bar. Bul ónimder tek dámdi ǵana emes, sondaı-aq paıdaly.
Polına jobasy agrotýrızmdi damytýǵa, omartaǵa ekskýrsıalar uıymdastyrýǵa jáne bal óndirý prosesin kórsetýge múmkindik beredi. Sonymen qatar, onyń jobasy aýyldyq aımaqtarda jańa jumys oryndaryn quryp, ekonomıkalyq ósýge yqpal etedi.