Túzeý mekemelerindegi Rejım jáne kúzet bólimi baqylaýshysynyń ár jumys kúni qarbalaspen bastalady. Kún saıyn tekserý pýnktinen 150 keıde 200 adamnyń ákelgen sálemdemelerin tekserip ótkizýdiń ózindik qıyndyǵy kóp.
Baqylaýshynyń eń basty qarýy – qyraǵylyq. Nan men shujyqty birneshe jerden kesip, jemis-jıdekterdi ortasynan qaq bólip, qoraptaǵy sháıdi basqa ydysqa aýdaryp salyp, qaltashadaǵy sháıdiń árbireýin ashyp qarap jatqan baqylaýshynyń jumysyna tek syrttan qarap turý úshin de shydam kerek-aq. Tutqyndaǵy adamdarǵa ákelgen kerekti zattardyń, azyq-túlik, kıim-keshektiń qalta-qýys, astaryna deıin tekserý kezinde baqylaýshylar kelýshilerdiń nebir aıla-sharǵysyna kýá bolady.
Mysaly, 1500-ge jýyq tutqyn ustalatyn Almaty qalasyndaǵy Tergeý ızolátorynda jyl basynan beri túrli tyıym salynǵan zattar anyqtaldy. Onyń ishinde jetkizý kezinde 4 lıtr spırttik ishimdikter, 21 uıaly telefon men 50 gram esirtki tektes zattar bar. Ásirese, kóp kezdesetini – uıaly telefondar men sim-kartalar. Qazir uıaly telefondardyń nebir shaǵyn túrleri shyǵyp jatyr. Adamnan aıla artylǵan ba, ony tutqyndarǵa jetkizý úshin tamaqtyń arasyna da, aıaq kıimniń ultanyna da jasyratyndar bar. Tyıym salynǵan zattardy ótkizý zańmen jazalanatyny týraly aýyzsha eskertýlerge de, tekserý ornyndaǵy arnaıy stendte turǵanyna da qaramastan tutqyndardyń týystary men tanystary osyndaı aıla-sharǵyǵa barady.
Sondaı-aq kúndelikti Tergeý ızolátoryna advokattar men qoǵamdyq qorǵaýshylar da kiredi. Olardy front-ofısten óter kezde tekseredi. Ókinishke oraı advokattar men qoǵamdyq qorǵaýshylardan da tyıym salynǵan zattar tabylady. Mysaly, jyl basynan beri advokat pen qoǵamdyq qorǵaýshylardan 450 000 astam aqsha men 2 uıaly telefon alyp kirý kezinde tárkilendi. Tize berse mundaı faktiler kóp, al ár faktiniń ar jaǵynda baqylaýshylardyń qyraǵy eńbegi bar.
Mine, baqylaýshynyń tynymsyz saǵattar men mınýttardan turatyn bir kúni osyndaı qarbalas ári jaýapty jumysqa toly kún.
– Baqylaýshynyń jumysy tústen keıin taǵy da qyza túsedi. Qabyldap alǵan zattardy endi sol tizim boıynsha ár kameradaǵy tutqynǵa tapsyrý da baqylaýshynyń mindetinde. Eger tergeý ızolátorynda myńnan asa adam jatyr desek, sonyń ishinen ózine kerek adamdy taýyp alý da jaýapty jumys. Arnaıy kartochka arqyly kamerany taýyp kelgen soń, tergeýdegi kúdiktige tapsyrǵan adamnyń tizimi boıynsha sanap turyp ótkizip beredi.
Sálemdemelerdi qabyldaýdyń osyndaı súzgiden ótkizý jumystaryn túsinbeıtin keıbir adamdar «kezekte uzaq turamyz, barlyq zatty nesine tekseredi» dep renjip te jatady. Al ol – bizdiń jumysymyz. Zań men tártip barshaǵa ortaq, – deıdi Almaty qalasy boıynsha QAJ departamentiniń rejım jáne qadaǵalaý tobynyń asa mańyzdy ister jónindegi aǵa jedel ýákili
ádilet podpolkovnıgi Nurlan Abdýllın.