Memleket basshysy Qasym-Jomart Toqaev Qazaqstan halqy Assambleıasynyń XXXIV sesıasyndaǵy «Biregeı birliktiń baıandy joly» atty sózinde ár azamattyń kókeıinde turýy tıis – el tutastyǵy, tatýlyq pen yntymaq, bereke men birlik sıaqty – qoǵam damýynyń tuǵyry bolyp tabylatyn taǵdyrsheshti máselege qaıyryla mán bergen. Qazirgi almaǵaıyp zamanda eldiń ishki tynyshtyǵy men judyryqtaı jumylǵan rýhanı tutastyqtyń quny kún saıyn qymbattap barady. Sondyqtan da Memleket basshysy osyny ár qazaqstandyqtyń berik este ustap, aınymaıtyn ómir saltyna aınaldyrýy qajet ekendigin oqtyn-oqtyn qaıtalaýdan jalyqqan emes.
Keńes ókimeti bizge Qazaqstan qoǵamyn quraıtyn qaýymnyń ártektiligin muraǵa qaldyrdy. Olar tegi ǵana emes, tili jaǵynan da eki alýan el boldy. Mine, osyndaı ártekti ortany bir memlekettik múddege uıystyryp, birtutas ulttyq maqsatqa baǵyttap sara jolǵa salý árqashanda zor kúsh-jigerdi, saıası sara joldy qajet etetini belgili. Prezıdenttiń bul máseleni únemi nazarynda ustaıtyny da sondyqtan. Bul oraıda, memlekettik saıasattyń altyn ózegin quraıtyn qazaq halqynyń sabyrly, salıqaly, sarabdal danalyǵy el táýelsizdiginiń altyn tuǵyry bolyp kele jatqandyǵyn atap aıtpasqa bolmaıdy. Prezıdent osy táýelsizdik jyldary jetken jetistikterdi, sonyń ishinde tildik teńsizdikte bolǵan olqylyqtardyń tolǵan ornyn paıyzdyq kórsetkishtermen órnektedi. Biraq buǵan toqmeıilsýge áli erte. Eń aldymen, otyz jyldan astam tózimdilikpen júrgizilip kele jatqan taýqymetti sharýanyń berekesin de kózdiń qarashyǵyndaı saqtaı bilýimiz qajet. Oǵan tónip turǵan ishki de, syrtqy da qaýip-qater joq emes. Ondaı jaǵdaılardyń quqyqtyq turǵydan qatań jazalanyp, ádiletti túrde aıyptalatynyn eskertedi.
Sondaı-aq, Qasym-Jomart Kemeluly memlekettik til máselesimen qosa jastar tárbıesine de erekshe nazar aýdardy. Onyń pikirinshe, bolashaq urpaq tek bilimdi ǵana emes, rýhanı-mádenı turǵydan da bilikti, eljandy azamat bolyp qalyptasýy tıis. Memlekettik tildiń biriktirýshi rólin arttyrý – barlyq etnos ókilderiniń ortaq mindeti ekenin de atap kórsetti.
Prezıdent eldegi aqparattyq qaýipsizdikti saqtaý, arandatýshylyq pen jalǵan aqparattarǵa qarsy turýdyń mańyzyn da aıtty. Bul – qoǵamdyq sanany ýytty áserden saqtaý arqyly birlikke bastaıtyn jol.
Sóz barysynda Prezıdent qazirgi zamannyń jańa syn-tegeýrinderine beıimdelý qajettigine nazar aýdardy. Ásirese, etnosaralyq qarym-qatynastarda ashyqtyq pen ádilettilik qaǵıdalaryn, azamattardyń quqyqtary men bostandyqtaryn saqtaý mańyzdy ekeni, etnostardyń áleýmettik ómirge teń qatysýy men olardyń mádenı erekshelikterin saqtaý arqyly ǵana elde turaqtylyq pen senimdi orta qalyptastyrýǵa bolatynyn basa aıtty. Qazaqstan qoǵamynyń tatý-tátti ómir súrýi – tek tarıhı erekshelik emes, sonymen birge memleket júrgizip otyrǵan syndarly saıasattyń da nátıjesi. Osy oraıda, Memleket basshysy Assambleıany eldegi turaqtylyq pen tatýlyqty saqtaý jolyndaǵy jumysyn jańǵyrtý qajettigin alǵa tartty.
Bul tolǵamdy sózdi el bolashaǵyna baǵyttalǵan naqty oı-pikirler men tereń saraptamalarǵa negizdelgen tujyrymdamalyq kózqaras dep qabyldaýǵa bolady.