Komandamyz myqty
Búgin Shotlandıanyń Glazgo qalasynda tenısten komandalyq álem chempıonaty – Bıllı Djın Kıng kýbogynyń fınaldyq kezeńinde Qazaqstan áıelder quramasy Ulybrıtanıamen kezdesedi, dep habarlaıdy Almaty-akshamy.kz QazAqparat-qa silteme jasap.
Mach aldynda ótken baspasóz máslıhatynda qurama kapıtany Iaroslava Shvedova qazaqstandyq qyzdardyń mundaı deńgeıdegi jarysqa alǵash ret qatysatynyna qaramastan, olarǵa senetinin málimdedi.
«Bizdiń komanda myqty, tek Zarına Dıas jetispeıdi, degenmen Jibek Qulambaeva qosyldy. Qyzdar bar yqylasymen daıyndalyp jatyr, qarsylasty da zertteýdemiz. Ádettegideı machqa ázirlenýdemiz. Azıa – Tynyq muhıty aımaǵynda osyndaı turpatta oınaǵandyqtan, bul bizge tańsyq emes. Jeńis úshin bar kúshimizdi salamyz», - dedi Ia.Shvedova.
Qurama kóshbasshysy Elena Rybakına Glazgoǵa álemniń myqty komandalarynyń jınalǵanyn, olardyń árqaısysynyń jeńisten úmitti ekendigin jetkizdi.
«Qazaqstan quramasy úshin bul álem chempıonatynyń alǵashqy fınaly bolmaq. Ár qurama kúshti bolǵandyqtan, báseke ońaıǵa túspeıdi. Jyldyń aıaǵy bolǵanyna qaramastan, qaı-qaısysy da el namysy úshin aıanbaıdy», - dedi 23 jastaǵy sportshy.
Qazaqstannyń ekinshi raketkasy Iýlıa Pýtınseva mundaı dodalarda reıtıńtiń pálendeı ról atqarmaıtynyn aıtty.
«Bıllı Djın Kıng kýbogynda reıtıń eshteńeni sheshpeıdi. Keıde úshinshi nemese tórtinshi júzdikke kiretin oıynshy úzdik 20, 50 nemese 100 tenısshiniń deńgeıinde óner kórsetip, qarsylasyn jeńip ketip jatady. Sondaı-aq keıde reıtıńisi joǵary sportshylar ulttyq qurama úshin básekede joǵary nátıje kórsete almaıdy. Tek munda kortqa shyǵyp, bar sheberligińdi sarp etip, óz komandańa upaı alyp berýdi ǵana oılaý kerek», - dedi Iý.Pýtınseva.
Qazaqstannyń juptyq syndaǵy birinshi raketkasy Anna Danılına AQSH-ta ótken WTA qorytyndy týrnırine qatysqandyqtan, Glazgoǵa keıin ushyp keldi. Ol mundaǵy aýa raıy men kortqa tez beıimdelý qajettigin aıtty.
«Ulttyq quramanyń týrnırdiń fınaldyq kezeńine ótkenine qýanyshtymyn. Men ekinshi ret el namysyn qorǵamaqshymyn. Komandaǵa kómektesemin dep úmittenemin», - dedi quramanyń eń jas oıynshysy Jibek Qulambaeva.
Komandany álem chempıonatynda qoldaý úshin Qazaqstan tenıs federasıasynyń prezıdenti Bolat Ótemuratov arnaıy keldi.
Bıllı Djın Kıng kýbogynyń Glazgodaǵy fınaldyq kezeńi 8-13 qarasha aralyǵynda ótedi. Qazaqstan búgin Ulybrıtanıamen, erteń Ispanıa quramasymen synǵa túsedi.