Memorandýmnyń mańyzy zor
Qazaqstan men Eýropalyq Odaq turaqty shıkizat, batareıalar jáne «jasyl» sýtek quny tizbegi salasyndaǵy strategıalyq áriptestik boıynsha ózara túsinistik týraly memorandýmdy bekitti, dep habarlaıdy Almaty-akshamy.kz QazAqparat-qa silteme jasap.
Qujatqa Mysyrda Klımattyń ózgerýi jónindegi jahandyq konferensıanyń (COP27) Álem kóshbasshylary samıti aıasynda QR Premer-Mınıstri Álıhan Smaıylov pen Eýropalyq komısıa Prezıdenti Ýrsýla fon der Láıen qol qoıdy.
Premer-Mınıstr óz sózinde jańa memorandýmnyń mańyzdylyǵyn atap ótti.
«Qujatqa qol qoıý Qazaqstannyń EO ónerkásiptik alánstarymen qarjylyq jáne tehnologıalyq yntymaqtastyǵyn ornatýyna jaǵdaı jasaıdy. Jalpy, bizdiń elimiz Eýropalyq bıznes úshin tartymdylyǵy joǵary qajetti faktorlardyń bárine ıe, onyń ishinde ártaraptandyrylǵan energıa kózderi men joǵary tranzıttik-kóliktik áleýet bar», — dedi Álıhan Smaıylov.
Sondaı-aq ol Eýropalyq Odaq – Qazaqstannyń eń iri jáne mańyzdy saýda seriktesi bolyp qala beretinin, elimizdiń syrtqy saýdadaǵy úlesiniń shamamen 30%-y Eýroodaqqa tıesili ekenin aıtty.
«Sonymen qatar búginde ınvestısıalyq yntymaqtastyqty arttyrý jáne ózara saýda kólemin ulǵaıtý boıynsha aıtarlyqtaı áleýet baryn kórip otyrmyz», — dedi Premer-Mınıstr.
Óz tarapynan Ýrsýla fon der Láıen Eýroodaq Qazaqstan ekonomıkasynyń eń iri ınvestorlarynyń biri bolyp tabylatynyn, sondaı-aq búgin qol qoıylǵan memorandým bul qatynastardy odan ári keńeıte túsetinin atap ótti.
«Biz osyǵan deıin qalyptasqan ózara tereń qarym-qatynasymyzdyń jańa paraǵyn ashtyq. Eýropalyq Odaq pen Qazaqstan kóp jyldan beri berik ekonomıkalyq baılanystardy damytyp keledi. Biz strategıalyq óndiristik tizbekterimizdiń ıntegrasıasyn nyǵaıtý baǵytynda birge jumys isteımiz. Bul sırek kezdesetin jer elementterin óndirýge, akýmýlátor óndirisine jáne «jasyl« sýtekke qatysty», — dedi Ýrsýla fon der Láıen.
Onyń aıtýynsha, bul óndiristik tizbekter búkil álemde «jasyl» jáne sıfrlyq ózgeristerdiń qozǵaltqyshtary bolyp tabylady.
«Mysaly, biz akýmýlátorlardyń elektromobılder úshin nemese jańartylatyn energıany saqtaý úshin qanshalyqty mańyzdy ekenin bilemiz. Sondyqtan dál qazir yntymaqtastyǵymyzdy nyǵaıtý úshin qolaıly sát», — dedi Eýropalyq komısıa Prezıdenti.
Ol ózara túsinistik týraly memorandým uzaq merzimdi áriptestik qatynastardy damytýǵa baǵyttalǵanyn atap ótti.