5-shi Dúnıejúzilik kóshpendiler oıyndaryna daıyndyq aıasynda Shymkenttegi ortalyq ıpodromda teńge ilýden II Azıa Kýbogy bastaldy, dep habarlaıdy almaty-akshamy.kz.
Baıraqty básekede Qazaqstan, Qyrǵyzstan, Ózbekstan, Reseı, Qytaı, Mońǵolıa, Tájikstannan kelgen sportshylar teńge ilýdiń 3 stıli boıynsha baq synaıdy.
Ashylý saltanatyna Ulttyq sport qaýymdastyǵynyń prezıdenti Islambek Saljanov, Teńge ilý federasıasynyń prezıdenti Amangeldi Ábdiqadyrov, Shymkent qalasy ákiminiń orynbasary Sársen Quranbek jáne jankúıerler, megapolıstiń turǵyndary men qonaqtary qatysty.
II Azıa Kýbogyn Teńge ilý federasıasy Ulttyq sport qaýymdastyǵynyń jáne Shymkent qalasy ákimdiginiń qoldaýymen uıymdastyrdy. İs-sharanyń bas seriktesi – «Samuryq-Qazyna» AQ, seriktesi – Sport Qory sportty qoldaý qory.
Ashylý saltanatynda sóılegen sózinde Ulttyq sport qaýymdastyǵynyń prezıdenti Islambek Saljanov memleket basshysy Qasym-Jomart Kemeluly Toqaevtyń qoldaýymen elimizde ulttyq sport túrleri qarqyndy damyp kele jatqanyn atap ótti.
Ózderińiz biletindeı, bıyl qyrkúıekte Astanada prezıdent bastamasymen 5-shi Dúnıejúzilik kóshpendiler oıyndary ótedi. Búgingi Azıa Kýbogy – osy «Kóshpendiler Olımpıadasy» aldyndaǵy jaýapty jarystardyń biri. Teńge ilý sportynyń Dúnıejúzilik kóshpendiler oıyndarynyń baǵdarlamasyna enýi, onyń álemdik deńgeıde tanymal bolýyna yqpal etedi, – dedi Islambek Saljanov.
Jarys aldynda Islambek Saljanov Teńge ilýden Qazaqstan ulttyq quramasynyń múshelerimen kezdesip, olarǵa aldaǵy saıystarda sáttilik tiledi.
II Azıa Kýbogyna 7 elden kelgen sportshylar qatysyp jatyr. Bul teńge ilý sportyna degen qyzyǵýshylyqtyń artyp kele jatqanyn aıǵaqtaıdy. Teńge ilý federasıasy Ulttyq sport qaýymdastyǵymen birlesip, osy ulttyq sport túrin halyqaralyq deńgeıde damytý boıynsha turaqty negizde aýqymdy jumys atqaryp jatyr. Atap aıtqanda, bıyl Halyqaralyq teńge ilý federasıasyn ashý kózdelip otyr.
Teńge ilý federasıasynyń prezıdenti Amangeldi Ábdiqadyrovtyń aıtýynsha, osy Azıa Kýbogyna elimizdiń úzdik sportshylary qatysyp jatyr.
Bul jarysta ulttyq quramamyzdyń sportshylary 5-shi Dúnıejúzilik kóshpendiler oıyndary qarsańyndaǵy óz daıyndyqtaryn kórsetedi. Al sheteldik quramalar Qazaqstannyń úzdik sportshylarymen tájirıbe almasýǵa múmkindik alady, - dedi federasıa basshysy.
Óz kezeginde Shymkent qalasy ákiminiń orynbasary Sársen Quranbek megapolıste ulttyq sportpen aınalysý úshin barlyq jaǵdaı jasalǵanyn, atap aıtqanda, 2023 jyly halyqaralyq deńgeıdegi jańa ıpodrom salynǵanyn, onda ulttyq sport túrleri boıynsha iri jarystar ótkiziletinin atap ótti.
Jarysty barynsha ádil baǵalaý úshin osy joly teńge ilý sportynyń tarıhynda tuńǵysh ret beıne qaıtalaý júıesi qoldanylady. Sonymen qatar, ýaqytty ólsheý úshin arnaıy lazer sekýndomer paıdalanylady.
Eske sala keteıik, Respýblıkalyq «Teńge ilý» federasıasy Qazaqstan Respýblıkasy Ulttyq sport qaýymdastyǵynyń quramyna kiredi. Qaýymdastyq quramynda budan ózge «Báıge», «Kókpar», «Aýdaryspaq», «Sadaq atý», «Jamby atý», «Qusbegilik», «Asyq atý», «JORYQ» at sporty jáne t.b. federasıalar bar. QR Ulttyq sport qaýymdastyǵyn belgili kásipker, mesenat, «Altyn Qyran Foundation» Qoǵamdyq qory Qamqorshylyq keńesiniń tóraǵasy Islambek Saljanov basqarady.