Qazaqstannyń eńbek sińirgen qaıratkeri, «Qurmet» ordeniniń ıegeri, Muhtar Áýezov atyndaǵy Qazaq ulttyq teatrynyń qoıýshy- rejıseri Orazhan Sádýaqasuly Kenebaev dúnıeden ozdy, dep habarlaıdy almaty-akshamy.kz.
Orazhan Sádýaqasuly Kenebaev – 1950 jyly 16 naýryzda Taldyqorǵan oblysy, Andreev aýdany, Tóńkeris aýylynda týǵan. Qazaqstannyń eńbek sińirgen qaıratkeri, «Qurmet» ordeniniń ıegeri ataqtaryn alǵan.
«Abaı» (Orazbaı), «Abylaı han» (Qaldan sheri, Orys elshisi), «Revızor» (Dýanbasy), «Tomırıs» (Balhash), «Qamar sulý» (Omar), «Mahabbattyń ǵajap áni» (Qojaq), «At jylaǵan tún» (Tóraǵa), «Qudalar» (Momyn), «Móldir mahabbat» (Ábýtálip) jáne basqa da spektáklderde oınady.
«Mosfılm» kınostýdıasynyń «Dıvızıa komandıriniń kúni» (Barlaýshy), «Qazaqfılm» kınostýdıasynyń «Álıa» (Soldat), «Ótelmegen qaryz» kınofılmderinde biraz rólderdi somdady.
Rejıserlik-qoıylymdyq jumystary: M. Zadornovtyń «Kúıeýińizdi satyńyzshy» spektakli, B. Muqaıdyń «Kavalerleri», O. Boranbaevtyń «Balamýty», Q. Muhametjanov pen Sh. Aıtmatovtyń «Fýdzıamadaǵy kezdesý» jáne basqalar. M. Áýezovtiń 100 jyldyǵyna arnalǵan Halyqaralyq festıválda «Qobylandy» spektakliniń qoıylymy úshin «Eń úzdik rejıser» bas júldesin aldy.