Qazaqstanda oqýshylar keńeıtilgen tegin medısınalyq tekserýden 6, 10, 12, 14, 15, 16 jáne 17 jastarda ótedi.
Bul týraly Almaty qalalyq №11 emhana dırektorynyń balalyq shaq jónindegi orynbasary Almash Ardabaeva aıtty, dep habarlaıdy Almaty-ashamy.kz QazAqparatqa silteme jasap.
Mekteptegi medısınalyq tekserý - jyl saıyn ótkiziletin is-shara, ony ótkizý ýaqytyn medısınalyq uıym belgileıdi jáne ony mektep aýmaǵynda Alǵashqy medısınalyq jedel járdemniń aýmaqtyq uıymynyń mamandary júrgizedi.
Dárigerdiń aıtýynsha, mektep oqýshylarynyń profılaktıkalyq medısınalyq tekserýden ótkeni durys. Sebebi, olarda bul kezeńde gormonaldy jáne fızıkalyq jaǵdaıdyń belsendi ózgeristeri bolady. Tekserý medısınalyq kómektiń kepildik berilgen kólemi sheńberinde tegin júrgiziledi.
Keńeıtilgen medısınalyq tekserýden ótý 6, 10, 12, 14, 15, 16 jáne 17 jastarda qarastyrylǵan.
«Mektepte medısınalyq tekserý balalardyń densaýlyǵyn baqylaý, qaýipti aýytqý men aýrýlardyń erte kórinisin anyqtaý úshin júrgiziledi. Balalarda, ásirese jasóspirimderde bul óte mańyzdy. Gormondar oınaı bastaǵanda, jetilmegen denede kútpegen jerden aqaýlar paıda bolýy múmkin. Al oqýdyń ózi aýyr jáne úlken stress. Sımptomdardy baqylaý jáne balaǵa ýaqytynda kómektesý - ony bolashaqta densaýlyqqa baılanysty kúrdeli máselelerden aryltady», - deıdi dáriger.
Almaty qalalyq qoǵamdyq densaýlyq saqtaý basqarmasynyń málimetinshe, alǵashqy aldyn ala medısınalyq tekserý birinshi synypqa túsken kezde júrgiziledi, ol turǵylyqty jeri boıynsha emhanada júrgiziledi. Ary qaraı oqýshylar ár oqý jylynyń basynda tekseriledi. Profılaktıkalyq medısınalyq tekserý mamandardyń tekserýin jáne medısınalyq aqparattyq júıede (MAJ) profılaktıkalyq medısınalyq qarap-tekserýden ótkeni týraly derekti toltyrýdy kózdeıdi.
Jasóspirimderge ótpeli kezeńde (6, 10, 14, 15, 16 jáne 17 jasta) tereńdetilgen (keńeıtilgen) profılaktıkalyq tekserý júrgiziledi. 7, 8, 9, 11, 13 jas aralyǵyndaǵy balalardy pedıatr nemese jalpy tájirıbe dárigeri men tis dárigeri tekseredi.
«Mysaly, 13 jastan bastap psıhotroptyq, esirtki zattarynyń medısınalyq emes qoldanylýyna nemese bolmaýyna tekserý júrgiziledi, 10 jastan asqan qyzdardy tekserý kezinde gınekologıalyq anamnezge, shaǵymǵa, etekkir fýnksıasynyń buzylýyna erekshe nazar aýdarylady. 12 jastan asqan balalardy tekserý kezinde shash ósý túrine (erkek nemese áıel túrine) nazar aýdarady. Kórsetilim bolǵan jaǵdaıda qyzdar balalar gınekologyna jiberiledi. 9-dan 10 jasqa deıingi balalarda abstraktili-logıkalyq operasıalardyń, logıkalyq paıymdaýdyń jáne t. b. qalyptasýy qosymsha baǵalanady. Patologıalyq ózgerister anyqtalǵan kezde mekteptiń medısına qyzmetkeri balany tirkelgen jeri boıynsha emhanaǵa beıindi mamanǵa qosymsha tekserýge jiberedi», - dep habarlady Almaty qalalyq qoǵamdyq densaýlyq saqtaý basqarmasynyń baspasóz qyzmeti.
Aıta keteıik, barlyq medısınalyq aqparattar medısınalyq qupıa bolyp tabylady. Oǵan tek ata-ana men jasóspirimniń ózi 15 jastan bastap qol jetkize alady.