Qazaqstandyqtardy tegin habarlandyrý saıttaryndaǵy alaıaqtar týraly eskertýde, dep habarlaıdy aqshamnews.kz.
Stopfake.kz alaıaqtardy tanyp, olardyń aılasyna qalaı túspeýge bolady jáne bankter olar ıemdenip ketken qarjyny qaıtarýǵa kómektese me degen suraqtarǵa jaýap bergen.
Bul sqema qalaı jumys isteıdi?
Alaıaqtar tegin habarlandyrý saıttarynda óz qyzmetterin nemese taýaryn jarnamalaıdy. Olar kez kelgen nárseni «satady»: konsertke bıletter, kompúterler, jıhazdar. Baǵasy barynsha tartymdy bolady – tómen bolsa da, kúdik týǵyzbaý úshin naryqtyq baǵa sheginde. «Satyp alýshy» baılanysqa shyqqannan keıin, alaıaqtar odan Telegram nemese WhatsApp messendjerine ótýdi suraıdy. Osydan keıin taýardy satyp alǵysy keletinder kóp, ony basqaǵa satpaý úshin aldyn ala tólem jasaýdy ótinedi. «Satyp alýshy» aqsha aýdarǵannan keıin, alaıaqtar hat-habardy óshirip, baılanysqa shyqpaı qoıady.
Satýshy qujattarynyń sýretin jiberdi – oǵan senýge bola ma?
Joq. Búginde zamanaýı grafıkalyq redaktorlarmen qujattardyń adamdy sendire alatyn «kóshirmesin» jasaý,a bolady. Onyń ústine, qujattyń túpnusqalyǵyn jaı sýret arqyly tekserý múmkin emes.
Satýshy taýarlardyń sýreti men vıdeosyn jiberdi. Oǵan senýge bola ma?
Fotosýret te, vıdeo da sizdi aldap jatpaǵanyna kepil bola almaıdy. Sýretti kórip, birden aqsha aýdarmaǵan jón.
Satýshy aldyn ala tólem suramaıdy, biraq satyp alǵan nársemdi jetkizetin kýrerdiń qyzmetine tólep qoıǵanymdy qalaıdy. Bul da alaıaqtyq pa?
Bul da alaıaqtyq bolýy múmkin. Eger kýrerdiń qyzmeti qajet bolsa, onda júrgizýshiniń ózine tóleýge nemese taýardy kýrermen jetkizý qyzmetin usynatyn kez kelgen taksı agregatoryn paıdalanýǵa bolady.
Tegin jarnama saıttaryn alaıaqtarǵa aldanyp qalmaı qalaı paıdalanýǵa bolady?
Qaýipsizdik maqsatynda kózben kórmegen taýar úshin aqsha aýdarmańyz.
Taýardy tańdaǵanda satýshynyń is-áreketin baqylańyz. Myna jaıttar kúmán týdyrýy kerek:
– sheshim qabyldaýǵa múmkindik bermeı, taýardy satyp alýǵa asyqtyrsa;
– taýardy satyp alǵysy keletinder kóp dep dúrliktirse;
– satýshy aldyn ala tólem jasaýdy surasa: kepil nemese jetkizý qyzmeti úshin tólem retinde.
Men alaıaqtarǵa aqsha aýdaryp qoıdym. Bank meniń aýdarymymdy keri qaıtaryp, aqshamdy bere ala ma?
Eger aqshany ózińiz aýdarsańyz, ony alýshynyń kelisiminsiz qaıtarý múmkin emes. Buǵan «Tólemder jáne tólem júıeleri týraly» QR Zańymen tyıym salynǵan.
Bank ózim sóılesý úshin maǵan aqshany alýshynyń derekterin bere ala ma?
Joq. Banktik shottar, operasıalar jáne klıentter týraly málimetter banktik qupıa bolyp tabylady. «Bankter jáne bank qyzmeti týraly» QR Zańynyń 50-babyna sáıkes bank aqsha aýdarymyn alýshy týraly derekterdi sottyń nemese basqa ýákiletti organdardyń suraýy boıynsha ǵana usynady.
Meni alaıaqtar aldap ketse ne isteýim kerek?
Birinshi kezekte, quqyq qorǵaý organdaryna aryz jazý kerek. Tártip saqshylary naqty sizdiń jaǵdaıyńyzda odan ári qalaı áreket etý kerek ekenin aıtady.
Sondaı-aq bul týraly bankke habarlańyz. Bank ishki tergeý júrgizip, zańǵa sáıkes aqshany alýshyǵa qatysty sharalar qabyldaıdy, sondaı-aq sizge, basqa klıentterge osy alaıaqtardyń áreketinen zardap shekpeýi úshin kómektesýge tyrysady.
Osy suraqtarǵa berilgen jaýaptarǵa qarap, alaıaqtardyń sqemalary kúrdeli emes ekenin baıqaımyz. Qarapaıym erejelerdi saqtap, saq bolsańyz, alaıaqtardy taný qıyn bolmaıdy.
«Kaspi.kz alaıaqtarǵa qarsy» naýqany aıasynda tegin habarlandyrý saıttaryndaǵy alaıaqtyq týraly jańa vıdeo shyqty. Alaıaqtardyń qalaı áreket etetinin kórińiz.
Esterińizge sala keteıik, Kaspi.kz Qarjy naryǵyn retteý jáne damytý agenttiginiń qoldaýymen eń kóp taralǵan alaıaqtyq sqemalary týraly aǵartýshylyq baǵyttaǵy birqatar beınerolıkter túsirdi. Jańa beınerolıkter eki apta saıyn Kaspi.kz-tiń resmı YouTube arnasynda jarıalanady.