58 keliden astam esirtki zattary tárkilendi, kontrabandanyń 57 áreketi toqtatyldy, bir jasyryn zerthana joıyldy, osyndaı nátıjelerdi Almaty qalasy Ekonomıkalyq tergeý departamentiniń basshysy Danıar Aqjanov óńirlik komýnıkasıalar qyzmetiniń baspasóz konferensıasynda habarlady.
Onyń aıtýynsha, Almaty áýejaıy Ortalyq Azıanyń iri avıasıalyq haby bola otyryp, esirtkini, negizinen AQSH pen Eýropa elderinen zańsyz ákelý áreketteriniń negizgi baǵyttarynyń biri bolyp qala beredi. Alaıda quqyq qorǵaý organdarymen júıeli jáne úılesimdi jumys júrgizýdiń arqasynda tyıym salynǵan zattardy jetkizý áreketteri udaıy toqtatylyp otyrady.
«Zań jáne Tártip» is-sharalary aıasynda biz esirtki quraldaryn kontrabandalyq ákelý faktilerin anyqtaý jáne jolyn kesý boıynsha belsendi jumys júrgizýdemiz. Tek ótken jyly ǵana 10 adam poshtalyq aýdarym arqyly kontrabanda jasaǵany úshin sottaldy, olarǵa naqty 8 jyldan 17 jylǵa deıin bas bostandyǵynan aıyrý merzimderi taǵaıyndaldy», - dep atap ótti Danıar Aqjanov..
Spıkerdiń aıtýynsha, jumys 2025 jyly da jalǵasýda. Esirtkini shekara arqyly zańsyz tasymaldaýdyń 11 faktisi tirkelgen. Almatyda, sondaı-aq Petropavl, Semeı, Kókshetaý, Shymkent jáne Óskemende ótkizilgen jedel is-sharalardyń nátıjesinde AQSH-tan pochta jóneltilimderin halyq tutynatyn taýarlar retinde jasyrylǵan esirtki zattarymen alǵan adamdar ustaldy.
«Zańsyz aınalymnan 8 kelige jýyq marıhýana men 15 kelige jýyq gashısh maıy alyndy. Bul - operatıvter, kınologtar jáne basqa da mamandardyń birlesken jumysynyń nátıjesi», - dedi Aqjanov.
Almaty ETD basshysy azamattardyń esirtki qylmysyna qarsy kúreske qatysýynyń mańyzdylyǵyn atap ótip, kúdikti faktiler týraly QR QM-1458 Call - ortalyǵynyń nómiri boıynsha habarlaýǵa shaqyrady.
«Esirtkiniń zańsyz aınalymyna qarsy kúres biz úshin basymdyq bolyp qala beredi. Biz Almatyda jáne búkil elde zańdylyq pen qaýipsizdikti qamtamasyz etý boıynsha jumysty jalǵastyratyn bolamyz», - dep qorytyndylady ETD basshysy.