Qasym-Jomart Toqaevqa Naýryz atty tazy kúshigi syıǵa berildi.
Prezıdent tazy ıtterdiń kórmesin tamashalady, dep habarlaıdy Almaty-akshamy.kz Aqordanyń baspasóz qyzmetine silteme jasap.
«Nomad» ulttyq saıatshylyq» qoǵamdyq qorynyń tóraǵasy Bolat Qunanbaev tazyny saqtaý, ósirý baǵytynda atqarylyp jatqan jumystar jóninde baıandady.
Memleket basshysy tazyny halyqaralyq deńgeıde dáripteý qajet ekenin aıtty.
– «Qumaı tazy – erekshe janýar, qazaqtyń jeti qazynasynyń biri. Biz tazy men tóbetti halyqaralyq deńgeıde keńirek dáripteýimiz kerek. Syrtqy ister mınıstrligi de mindetti túrde atsalysýy qajet. Tazyǵa erekshe kútim, qamqorlyq kerek. Bul mańyzdy is kásibılikti talap etedi. Sol úshin arnaıy zań qabyldadyq», – dedi Qasym-Jomart Toqaev.
Shara barysynda asyl tuqymdy tazy ósirýshi Anna Zaharova Prezıdentke tazynyń kúshigin syıǵa tartty. Kúshiktiń aty – Naýryz, 1,5 aılyq.
«Sizge syılyq tartý etkimiz keledi. Ejelden qazaqy ıt tuqymy Qazaqstanda óte qundy syılyqtyń biri sanalyp kelgen edi. Ókinishke oraı, sońǵy jyldary onyń qundylyǵy tómendep bara jatyr. Siz qabyldaǵan qazaqy ıt tuqymdaryn saqtaý jáne kóbeıtý jónindegi jańa zańdy qabyldaýdyń arqasynda myna kúshik te tazy tuqymyn kóbeıtýge septigin tıgizedi dep úmittenemiz. Qujattary bar, aty – Naýryz. Ol osydan 1,5 aı buryn dúnıege keldi. Tuqymynda jalǵyz bolǵandyqtan, osyndaı at berýdiń nyshandyq máni boldy», - dedi Prezıdentke kúshikti syıǵa tartqan asyl tuqymdy tazy ósirýshi Anna Zaharova.
