Almatyda “Taza Qazaqstan: tabıǵat pen ulttyń birliginde” atty ekologıalyq-mádenı is-shara sátti ótti. Bul aýqymdy jıyn – elimizdegi ekologıalyq qozǵalystyń jańa kezeńin bildirip qana qoımaı, halyqaralyq yntymaqtastyqty nyǵaıtatyn mańyzdy alańǵa aınaldy.
İs-shara “Baıtaq” jasyldar partıasynyń bastamasymen uıymdastyrylyp, oǵan elimizdiń túkpir-túkpirinen kelgen partıa músheleri, qoǵam qaıratkerleri men Muhtar Shahanov, Asyly Osman bastaǵan zıaly qaýym ókilderi qatysty. Sonymen qatar, Qyrǵyzstan, Ózbekstan jáne Mońǵolıa elderiniń jasyldar partıasy ókilderi arnaıy delegasıalarmen kelip, is-sharanyń halyqaralyq mańyzyn arttyrdy.
Ortalyq Azıa men Eýropa elderiniń dıplomatıalyq jáne resmı ókilderiniń qatysýy ekologıalyq jaýapkershiliktiń ortaq ekenin aıqyn kórsetti.
İs-shara barysynda ulttyq oıyndar men qolóner kórmesi; eko-bilimge arnalǵan dóńgelek ústelder men pikirtalastar; mádenı konserttik baǵdarlama qamtyldy. Byltyr “Taza Qazaqstan” respýblıkalyq ekologıalyq aksıasy aıasynda 6,2 mıllıonnan astam adam qatysyp, 1,1 mıllıon tonna qaldyq jınaldy. Sonymen birge, 1,6 mıllıonnan astam aǵash otyrǵyzylyp, zańsyz 4 800 qoqys alańynyń 91 paıyzy joıyldy. Azamattardyń shaǵymdary men usynystaryn qabyldaıtyn @TazaQazBot telegram-boty arqyly 10,7 myń ótinish túsip, olardyń 9,7 myńy oń sheshimin tapty. Bul kórsetkishter Qazaqstan azamattarynyń ekologıalyq sana-seziminiń artyp kele jatqanyn kórsetedi. “Taza Qazaqstan” – tabıǵatty qorǵaý men ulttyq birlikti ushtastyratyn biregeı platforma retinde qalyptasyp keledi.
“Taza ekologıa – bul ulttyń densaýlyǵy men bolashaǵy. Tabıǵatty qorǵaý arqyly biz ulttyq bolmysymyzdy, urpaǵymyzdyń amandyǵyn saqtap qalamyz. Bul – ár azamattyń ortaq paryzy. “Taza Qazaqstan” – bul tek bir kúndik aksıa emes, bul – turaqty, júıeli nyq qadam. Ol elimizdiń jasyl bolashaǵyn qamtamasyz etýge baǵyttalǵan ortaq mindet pen jahandyq jaýapkershilik úlgisi”, – deıdi “Baıtaq” jasyldar partıasynyń tóraǵasy Azamathan Ámirtaev.