Búgin Almaty qalasynda respýblıkalyq «Taza Qazaqstan» jáne qalalyq «Almaty –ortaq úıimiz» kampanıasy aıasynda aýqymdy qalalyq senbilik ótti.
Sharaǵa qalanyń barlyq komúnıtı-ortalyqtarynan 500-den astam rezıdent qatysty. Qatysýshylar tek ortalyqtardyń mańaıyn ǵana emes, saıabaqtar men skverler sıaqty qoǵamdyq oryndardy da tazartýǵa belsene kómektesti.
Senbilikke qatysqan jastar jyl boıy ekologıalyq jaǵdaıdy jaqsartýǵa baǵyttalǵan aksıalarǵa dástúrli túrde qatysatyndaryn jetkizdi.
«Ekologıalyq aksıalar — bul tek qalany tazartý ǵana emes, tabıǵatqa qamqorlyq jasaıtyn adamdardyń birligin sezinýdiń múmkindigi. Osyndaı senbilikter arqyly, qalamyzdyń tazalyǵyna kishkene bolsa da úles qosqymyz keledi», - dediTúrksib aýdany komúnıtı ortalyǵynyń basshysy Taýasar Murathan.
Komúnıtı-ortalyqtar Almatyda ekologıalyq mádenıetti damytýdaǵy mańyzdy alańǵa aınaldy. Almaty qalasy Jastar saıasaty basqarmasynyń málimetinshe, 2024 jyldyń basynan beri bul ortalyqtarda 1500-den astam is-shara ótken, onyń ishinde dárister, semınarlar, eko-aksıalar, ıntellektýaldyq oıyndar, sheberlik sabaqtary, akýstıkalyq keshter, sporttyq týrnırler jáne t.b. Bul is-sharalarǵa jalpy 375 myńnan astam adam qatyssa, sonyń 27 myńy NEET sanatyndaǵy jastar.
Osy jyldan bastap árbir komúnıtı ortalyqta qazaqstandyq óndiristiń fandomattary – olardy odan ári óńdeý úshin plasıkalyq bótelkeler men alúmını bankalardy jınaý apparattary ornatyldy. Sonymen qatar «Plastic reboot» aksıasy aıasynda komúnıtı ortalyqtar 1 tonnaplastık qaqpaq jınady.
Osylaısha, osy jastar keńistigine kelýshiler arasynda ekologıalyq qundylyqtar qalyptasýda, al komúnıtı ortalyqtardyń rezıdentteri qorshaǵan ortany qorǵaýǵa baǵyttalǵan sharalardy qoldaı otyryp, ekoreındjerler qataryn belsendi tolyqtyrýda.