Almaty turǵyndary men qonaqtary kósheler men skverlerdiń tazalyǵyna nazar aýdardy
Almatyda qys qarsańynda qalanyń aýmaqtary men qoǵamdyq keńistikterinde aýqymdy tazartý jumystary aıaqtalyp keledi. 25-30 qarasha aralyǵynda «Taza Qazaqstan» tujyrymdamasy men «Almaty – bizdiń ortaq úıimiz» qalalyq bastamasy aıasynda qala ákimi Erbolat Dosaevtyń tapsyrmasymen kóshe-jol jelisi, qoǵamdyq oryndar, ózen arnalary, qoqys jáshikteri men aryq júıesin tazartý jumystary júrgizildi, dep habarlaıdy aqshamnews.kz
Búginde belsendi almatylyqtar megapolıstiń kórnekti oryndarynyń biri – Baým toǵaıynda jınaldy. Ekologıalyq aksıaǵa 80-nen astam adam qatysty. Olar saıabaq aımaǵyn qoqystan tazartyp qana qoımaı, qorshaǵan ortaǵa qamqorlyq tanytýdyń úlgisin kórsetti. Aksıa barysynda 300 qap qoqys jınaldy.
«Memleket basshysynyń bastamasymen qolǵa alynǵan «Taza Qazaqstan» ekologıalyq aksıasy tabıǵatqa tutynýshylyq kózqarasqa qarsy azamattardy biriktiredi. Bul bastama qorshaǵan ortany saqtaý máselesine nazar aýdarýǵa, týǵan jerge uqypty qaraý mádenıetin qalyptastyrýǵa baǵyttalǵan», – dedi «Medeý» tabıǵı parki dırektorynyń mindetin atqarýshy Uzaq Jambyluly.
Bul is-shara ekologıalyq máselelerdi sheshý úshin qoǵamnyń birige alatynyn kórsetti. Aksıaǵa qatysýshylar arasynda belgili mádenıet qaıratkerleri de boldy. Olar qala turǵyndaryn qoǵamdyq oryndardyń tazalyǵyn saqtaýǵa jáne tabıǵatqa qamqorlyq jasaýǵa shaqyrdy.
«Taza Qazaqstan» tujyrymdamasy – elimizdiń ekologıalyq mádenıetin qalyptastyrý men qaýipsiz bolashaǵyna jasalǵan mańyzdy qadam. Ár turǵyn bul iske úles qosýy kerek. Bul ózimiz, tabıǵatymyz jáne keleshek urpaq úshin qajet. Biz óz úlgimizben tabıǵatty saqtaý men tazalyqty qorǵaý máselesine nazar aýdartqymyz keledi. Tabıǵatqa uqypty qarańyzdar», – dedi «Alataý» dástúrli óner teatrynyń aktrısasy Alma Amanjolova.
Almatylyqtar men qala qonaqtary qalanyń kósheleri men saıabaqtarynyń aıtarlyqtaı taza bolǵanyn atap ótýde. Árıne, tazartýdy qajet etetin jeke ýchaskeler bar, biraq jalpy alǵanda qalalyq qyzmettiń jumysy kórinip-aq tur.
«Men osy mańda turamyn, súıikti ornymyzdyń árdaıym tazartylatynyn kóremin. Ár jastaǵy turǵyndardyń beı-jaı qaramaı, paıdaly aksıalarǵa qatysatyny qýantady. Qalaǵa qamqorlyq jasalyp jatyr, kósheler men aýlalar taza, jınaqy bolyp qalǵan. Árıne, bári birden minsiz bolmaıdy, óıtkeni bul iri qala. Ókinishke qaraı, turǵyndardyń ózderi jıi qoqys tastaıdy. Eń bastysy, qala ákimi Almatyny taza jáne jınaqy etý maqsatyn qoıdy, bul iste bárimizdiń qatysýymyz qajet», - dep jergilikti turǵyn Almagúl oıyn aıtty.
Eske salaıyq, Tazalyq aptalyǵy aıasynda qalanyń komýnaldyq qyzmeti sýyq pen qar jaýýyna daıyndyqty aıaqtady. Qysqy ýaqytta qalaǵa qyzmet kórsetý úshin 841 birlik tehnıka men 1400 jumysshy jumyldyryldy. “Almaty tazalyq” MKK avtoparki jumysty tıimdi júrgizý úshin 32 zamanaýı mashınamen tolyqty. Jalpy aýmaǵy 25,1 mln sharshy metr, uzyndyǵy 2 777 km bolatyn 2 318 kóshe tazartyldy. Kóshe-jol jelisin jınaýǵa 10 merdiger uıym jaýapty.
Aryq jelisiniń uzyndyǵy 1 525 km bolatyn bóligi tazartýǵa erekshe nazar aýdaryldy. Kúnine shamamen 160 tekshe metr plasık pen japyraqtar sıaqty qoqys shyǵarylady.
TOO «Eco Almaty» Almaty qalasy aýmaǵynda uzyndyǵy 19,2 km bolatyn sý arnalarynyń tazartý jumystaryn júrgizdi. Onyń ishinde, Úlken Almaty ózeniniń ál-Farabı dańǵylynan Sátbaev kóshesine deıingi bóligi, Esentaı ózeniniń ál-Farabı dańǵylynan Shevchenko kóshesine deıingi bóligi jáne D. Qonaev atyndaǵy ÚAK arnalary tazartyldy.
Sonymen qatar, «Taza Qazaqstan» tujyrymdamasy aıasynda jańa erejelerge sáıkes 2 myńǵa jýyq kásipker abattandyrý pasporttaryna qol qoıdy. Bul sharalar almatylyqtar men qala qonaqtary úshin qolaıly, qaýipsiz jáne ekologıalyq taza orta qurý strategıasynyń bir bóligi bolyp tabylady.