Búgin Almaty qalasynyń turǵyndary erekshe oqıǵaǵa kýá boldy. «Atakent» kórme ortalyǵy aldyndaǵy serýendeý aımaǵynda ótetin tazalyq aksıasy barysynda qalanyń tazalyǵyn qamtamasyz etýshi qyzmetkerlerge kútpegen jerden kómekke sýperqaharmandar keldi. Olardyń qatarynda Halk, Órmekshi adam, Betmen jáne Sýpermen boldy. Bul tanymal keıipkerler kóshelerdi sypyryp, turǵyndarǵa qalany taza ustaý qajettigin nasıhattady, dep habarlaıdy aqshamnews.kz.
Sýperqaharmandar álemdi qutqarý syndy úlken istermen aınalysqanyna qaramastan, qala kóshelerin jınaýǵa kiristi. Órmekshi adam turǵyndardy tazalyqqa atsalysýǵa shaqyryp, trotýarlardy tazalaýǵa kómektesti.
– Men Almatyǵa arnaıy tazalyq sharasyna qatysý úshin keldim. Komandammen birge shamamen bir saǵat boıy sypyrǵyshpen jumys istedik. Turǵyndarǵa jaqyndap, birge tazalyq júrgizýge shaqyrdym. Keıbireýleri kelisip, kómektesti, al keıbireýleri bas tartty. Bir qyzylordalyq azamat Almatynyń tazalyǵyn joǵary baǵalap, munda senbilikter jıi ótetinin aıtty. Sondaı-aq, balalardy da tazalyqqa úırettim – olar bul iske qýana-qýana kiristi, – dep bólisti Órmekshi adam.
Betmen men Sýpermen kóshe tazalaýshylardyń arbalaryn kólikke jetkizýge kómektesse, Halk jolda turyp qalǵan samosvaldy ıterip jiberdi.
– Bul men úshin jańa tájirıbe boldy. Dúnıejúzilik beıbitshilik úshin kúrespen salystyrýǵa bolady. Dvornıkterdiń eńbegi zor, olardy qatty qurmetteımin. Bizdiń qalamyzda óte qonaqjaı adamdar turady, olar árdaıym qalanyń tazalyǵyn qoldaıdy, – dedi anımator Rústem Ǵadaev.
Tazalyq qyzmetkerleri bastapqyda muny jaı ǵana kóńil kóterý dep oılady. Alaıda, sýperqaharmandardyń shynaıy túrde tazalyqqa aralasqanyn kórip, kúlimsirep, olarǵa alǵystaryn bildirdi.
– Búgin biz «Atakent» aýmaǵynda senbilik ótkizip jatqan edik. Sol kezde sýperqaharmandar kelip, bizdiń jumysymyzǵa kómektesti. Olar sypyrǵyshtardy alyp, bizge ystyq shaı usyndy. Bul bizdiń eńbegimizdi baǵalaýdyń erekshe belgisi boldy. Barsha turǵyndardy qoqysty qoqys jáshigine tastaýǵa shaqyramyn, bul bizdiń jumysymyzdy jeńildeter edi. Uıymdastyrýshylarǵa rahmet! – dedi tazalaýshy Táteı Qystaýbaeva.
Bul aksıaǵa jaqyn mańdaǵy dámhanalar men dúkenderdiń qyzmetkerleri de nazar aýdardy. Kópshiligi sýperqaharmandarmen birge sýretke túsip, óz alǵystaryn bildirdi.
– Men Almaty qalasynyń turǵynymyn. Búgin sýperqaharmandardyń kóshelerdi tazalap júrgenin kórip, tańqaldym. Qalanyń tazalyǵy úshin osyndaı sharalardy uıymdastyryp jatqan ákimdikke alǵysymdy bildiremin. Jyl saıyn Almaty burynǵydan da taza jáne kórkem bolyp keledi. Tazalaýshylarǵa arnalǵan jańa tehnıka alynyp, olardyń eńbegi jeńildep jatyr. Qala tazalyǵyn saqtap júrgen tazalyq qyzmetkerleriniń eńbegi zor, – dedi saýda ortalyǵynyń qaýipsizdik qyzmetiniń basshysy Qanat Dúısenbıev.
Bul shara turǵyndarǵa qalanyń tazalyǵyn saqtaý jaýapkershiligin eske salyp, tazalyq qyzmetkerleriniń eńbegin joǵary baǵalaýǵa shaqyrdy.