Aınur BEGİMBAEVA, Energetıka jáne jasyl tehnologıalar ınstıtýtynyń dırektory:
Sońǵy 10 jylda Qazaqstannyń ǵalymdary ortasha jyldyq temperatýranyń shamamen 7%-ǵa artqanyn atap ótti. Bul ózgeris 2016 jylmen salystyrǵanda oryn alyp otyr. Iaǵnı, klımattyń ózgerýi biz oılaǵannan áldeqaıda tez, bir urpaqtyń kóz aldynda júrip jatyr. Biz qazirgi ýaqytta klımattyq kún tártibinde belgilengen normalardan asyp ketýdemiz.
Klımattyń ózgerýimen kúresý, jáne bul ózgeristerdiń tereń ári qaýipti saldaryn boldyrmaý úshin jańa energetıkalyq sheshimder qajet. Osy maqsatta atom elektr stansıalaryn salý mańyzdy. Atom generasıasy qazirgi ýaqytta tómen kómirtekti energıa kózderiniń eń tıimdisi retinde dáleldengen. Ol bizge parnıktik gazdardyń shyǵaryndylaryn azaıtyp, ekologıalyq tepe-teńdikti saqtaýǵa múmkindik beredi.
Atom energetıkasyn damytý bizdiń aldymyzda turǵan turaqty damýdyń birneshe mańyzdy maqsattaryna qol jetkizýge kómektesedi. Birinshiden, bul taza energıaǵa qol jetkizý jáne ony halyqqa qoljetimdi etý múmkindigin beredi. Taza energıaǵa kóshý – búgingi kúnniń basty mindetteriniń biri. Ekinshiden, bul klımattyń ózgerýine qarsy kúrestiń eń tıimdi joldarynyń biri. Atom energetıkasy kómirtegi izin azaıtyp qana qoımaı, bizge ekologıalyq turaqtylyqty qamtamasyz etýge múmkindik beredi.
Atom elektr stansıalaryn salý – Qazaqstannyń energetıkalyq bolashaǵyn jáne klımattyń ózgerýine qarsy kúrestegi tabysyn qamtamasyz etetin negizgi qadam. Klımattyń ózgerýi bizdiń qolymyzdaǵy sheshimderge táýeldi, sondyqtan búginnen bastap batyl áreket etýimiz qajet.