Almaty sarapshylary Prezıdenttiń Joldaýyn talqylady
Almaty qalasynyń Óńirlik komýnıkasıalar qyzmetinde Prezıdent Qasym-Jomart Toqaevtyń 2024 jylǵa arnalǵan Joldaýyn talqylaý ótti. Sarapshylar azamattyq qoǵamdy biriktirýdiń mańyzdylyǵyn jáne úkimettik emes uıymdardyń (ÚEU) el damýyna belsendi úles qosýy qajettigin atap ótti, dep habarlaıdy aqshamnews.kz
Almaty qalalyq máslıhatynyń depýtaty Ramazan Bekbol Batyrjanuly Joldaýdyń ınfraqurylymdy jańǵyrtý men áleýmettik máselelerdi sheshýdegi mańyzdylyǵyna toqtaldy. Onyń aıtýynsha, Joldaý energetıka jáne turǵyn úı-kommýnaldyq sharýashylyq salalaryna erekshe kóńil bóledi.
«Prezıdent energetıkany jańǵyrtý jónindegi ulttyq jobany jyl sońyna deıin bekitýdi tapsyrdy. Qazirgi kezdegi eń ózekti másele – energıa tapshylyǵy, ony qysqa merzimde sheshý qajet», — dedi Bekbol.
Sarapshy, sondaı-aq, bıznes úshin jaǵdaıdy jaqsartý jáne agroónerkásip keshenin qoldaýdyń mańyzdylyǵyn atap ótti. Ol memlekettik qarajatty tıimdi ári ashyq paıdalaný jáne halyqty atom energetıkasy sıaqty jańa tehnologıalardyń artyqshylyqtary týraly habardar etý qajettigin aıtty.
Fılosofıa jáne saıasattaný ınstıtýtynyń bas ǵylymı qyzmetkeri Muhtarbek Shaıkemelev Prezıdent Joldaýynda zań ústemdigin saqtaý mańyzdy ekenin atap ótti.
«Halyqtyń birligi men zańdylyqty saqtaý — Prezıdent ár Joldaýynda erekshe aıtatyn eki negizgi shart. Osy eki shartsyz alǵa qoıylǵan mindetterdi iske asyrý múmkin emes», — dep túsindirdi Shaıkemelev.
İs-sharaǵa Almaty Azamattyq Alánsynyń tóraǵasy Qaıyrjan Ábdihalyqov ta qatysyp, azamattyq qoǵam men úkimettik emes uıymdardyń ádil qoǵam qurýdaǵy rólin atap ótti.
«Sońǵy jyldary azamattyq qoǵamnyń róli kúsheıe tústi. "Halyq únine qulaq asatyn memleket" tujyrymdamasyn júzege asyra otyryp, memleket pen azamattar arasyndaǵy baılanysty ÚEU men qoǵamdyq keńester arqyly nyǵaıtýdamyz», — dedi Ábdihalyqov.
Sonymen qatar, sarapshylar Prezıdenttiń 2025 jyldy «Jumysshy mamandyqtar jyly» dep jarıalaý bastamasyn da talqylady. Ábdihalyqovtyń aıtýynsha, bul qadam ınfraqurylymdyq jobalarǵa qajetti kadrlardy daıarlaýda mańyzdy ról atqarady.
«Joldaýda aıtylǵan 17 iri jobany júzege asyrý úshin jumysshylar qajet. Bizge tehnıkter, ınjenerler, qurylysshylar sekildi mamandar qajet. Qazirdiń ózinde tehnıkalyq jáne qurylys kolejderinde kadrlardy daıarlaý úshin granttar bólinýde», — dep túsindirdi ol.
Ramazan Bekbol da bul bastamanyń jumysshy mamandyqtarynyń bedelin arttyryp, jastarǵa jańa múmkindikter ashatynyn aıtty.
«Bul jastarǵa óz salasynda jetistikke jetýge jáne joǵary bilikti maman bolýǵa múmkindik beredi. Bizge tehnıkalyq jáne ındýstrıalyq salalarda mamandar qajet», — dedi Bekbol.
Jalpy, sarapshylar Prezıdenttiń Joldaýynda eldi damytýǵa jáne halyqtyń ál-aýqatyn arttyrýǵa baǵyttalǵan naqty ári aıqyn mindetter bar degen qorytyndyǵa keldi. Bul mindetterdiń sátti júzege asýy azamattyq qoǵamnyń belsendi qatysýy men halyqtyń birligine tikeleı baılanysty.