«Taza Qazaqstan» bastamasy aıasynda respýblıka kóleminde ekologıa departamentteri men polısıa bólimsheleri birlesip, avtokólikterden bólinetin zıandy zattardyń deńgeıin tekserý maqsatynda «Taza aýa» reıdteri bastaldy.
Shymkent qalasynda ótken reıd barysynda Temirlan tas jolynda arnaıy gaz analızatorlarynyń kómegimen benzın, gaz jáne dızel qozǵaltqyshtary bar kólikterdiń shyǵaryndylary tekserildi. Nátıjesinde kómirtegi totyǵy, kómirsýtekter jáne tútin deńgeıi anyqtaldy.
Barlyǵy 22 avtokólik tekserilip, onyń 8-inde (4 dızeldi jáne 4 gaz-benzındi) aýaǵa taraıtyn gazdardyń normadan artyq ekeni belgili boldy. Tártip buzǵan júrgizýshiler QR Ákimshilik quqyq buzýshylyq týraly kodeksiniń 334-baby boıynsha jaýapkershilikke tartyldy.
Mamandardyń aıtýynsha, mundaı reıdter qyrkúıek pen qazan aılarynda elimizdiń ózge óńirlerinde de jalǵasady. Ekologıalyq qyzmet ókilderi turǵyndarǵa kólikterge ýaqytyly tehnıkalyq qyzmet kórsetýdiń mańyzyn eskertti. Óıtkeni durys kútim jasalǵan kólik zıandy shyǵaryndylardy azaıtyp, aýanyń sapasyn jaqsartýǵa yqpal etedi.