2025 jyl Qazaqstanda Jumysshy mamandyqtar jyly bolyp jarıalandy. Bul bastama elimizdiń bilim berý júıesi men eńbek naryǵyna tyń serpin berip otyr.
Eń aldymen, óńirlerde jumysshy kadrlardy daıarlaýdyń sapasyn arttyrýǵa baǵyttalǵan naqty josparlar qabyldandy. Tehnıkalyq jáne kásiptik bilim berý salasyna erekshe kóńil bólinip, kolejderdiń materıaldyq-tehnıkalyq bazasy jańartylýda. Stýdentterge arnalǵan jańa jataqhanalar salynyp, oqý oryndary zamanaýı qural-jabdyqtarmen qamtamasyz etilýde.
Jastardyń jumysshy kásipterge degen qyzyǵýshylyǵyn arttyrý maqsatynda mektepterde kásibı baǵdar berý keńinen jolǵa qoıyldy. Búgingi tańda bul baǵyttaǵy jumysqa 2,5 mıllıonǵa jýyq oqýshy qamtylǵan. Sonymen qatar, dýaldy oqytý júıesi arqyly stýdentter bilimmen birge tájirıbe jınaqtaýda. El boıynsha 100 myńnan astam stýdent kásiporyndarda tájirıbeden ótýde, al halyqaralyq standarttarǵa saı oqý ortalyqtary ashylyp, jastardyń sheberligin shyńdaýǵa jol ashyldy.
Jumysshy mamandarǵa degen suranysty qamtamasyz etý úshin jańa bilim berý baǵdarlamalary engizildi. Kásiporyndardyń tapsyrysy boıynsha oqyǵan túlekterge jumysqa ornalasý kepildigi beriledi. Jyl saıynǵy qabyldaý jospary da keńeıip, qosymsha 15 myń oryn bólindi. Nátıjesinde, bıyldyń ózinde myńnan astam kolej túlegi elimizdiń iri kásiporyndarynda eńbekke kiristi.
Sonymen qatar, eńbek adamdaryna áleýmettik qoldaý sharalary kúsheıtildi. Jumysshy mamandyq ıeleri úshin jeńildetilgen ıpotekalyq baǵdarlamalar iske qosyldy. Bul shara jastardyń eńbekke yntasyn arttyryp qana qoımaı, eldiń áleýmettik turaqtylyǵyna da yqpal etpek.
Jumysshy eńbeginiń qadirin arttyrý – memlekettiń basty maqsattarynyń biri. Jańa bastamalar jas urpaqqa eńbekqorlyq pen kásibılik qundylyǵyn dáriptep, qoǵamdaǵy jumysshy mártebesin bıiktetetini sózsiz.