Ekologıalyq qaýipsizdik máselesinde ekoposttardyń mańyzy zor. Qorshaǵan ortanyń ahýalyn jaqsartý úshin «Taza Qazaqstan» respýblıkalyq baǵdarlamasy aıasynda «Taza aýa» naýqany jalǵasyn taýyp keledi. Ótken demalys kúnderi polıseıler ekologtarmen birge birneshe kólikti tekserip, ekologıalyq talapqa sáıkes kelmeıtin kólik júrgizýshilerine ákimshilik hattama toltyrdy.
Monıtorıńtiń maqsaty – kólikterdiń zıandy shyǵaryndylaryn azaıtyp, ekologıalyq standartqa sáıkestigin qadaǵalaý. Almatyǵa kiretin kólikterdi tekserý úshin 19 ekologıalyq post ornatylǵan. Aýa sapasyn baqylaý úshin mundaı nysandardan bólek, taǵy 3 jyljymaly ekologıalyq beket jumys isteıdi. Ekobeketterdegi mobıldi qurylǵylar aýa sapasyn baqylap, ekologıalyq jaǵdaıdy jaqsartý maqsatynda qoldanylady. Ekologtar arnaıy qondyrǵymen bir sátte kólikten bólingen gazdyń kólemin anyqtaıdy. Beketter qalanyń kireberis joldarynda, mańyzdy kólik toraptarynda jáne lastaný deńgeıi joǵary aımaqtarda ornalasqan.
2023 jyly ekoposttarda Almaty qalasy Polısıa departamentiniń qyzmetkerleri 25 728 ákimshilik hattama rásimdedi. 2024 jyly júrgizilgen 204 996 ólsheý nátıjesinde, 34 708 avtokóliktiń (nemese 17%-ynyń) belgilengen ýyttylyq jáne tútindilik deńgeıinen asyp ketkeni anyqtaldy. Osyǵan baılanysty 31 682 ákimshilik hattama toltyrylǵan.
· Taqyrypqa oraı
Abdýhamıt AMANQUL, aǵa ekolog: Aýa sapasyn jaqsartýdyń joly
«Taza aýa» aksıasy aıasynda 2024 jyly jyljymaly ekoposttar qala aýmaǵynda 1197 ólsheý júrgizdi. Onyń ishinde 239 dızeldi, 958 benzın-gazben júretin avtokólik tekserildi. Nátıjesinde 552 avtokóliktiń (ıaǵnı tekserilgenderdiń 46%-ynyń) belgilengen normalardy buzǵany anyqtaldy. 466 avtokólikte kómirtegi totyǵynyń (CO) mólsheri ruqsat etilgen deńgeıden joǵary, 86 avtokólikte tútindilik deńgeıiniń artqany tirkeldi. Jyljymaly ekoposttar atalǵan zańbuzýshylyqtar boıynsha 20 memlekettik tirkeý nómirin ýaqytsha tárkiledi. Qazirgi ýaqytta 12 avtokólik aqaýlaryn joıyp, qaıta tirkeýge alyndy. Ekoposttardyń oń nátıjesi – ýyttylyq jáne tútindilik normalaryn buzatyn avtokólikter sanynyń azaıýy. 2020 jyly bul kórsetkish 20%-dan astam bolsa, 2024 jyly shamamen 17%-dy qurady.