Halyqaralyq sımpozıým onlaın rejımde boldy.
İs-sharany Qazaqstan Respýblıkasynyń Konstıtýsıalyq Keńesi «Astana» Halyqaralyq qarjy ortalyǵymen birlesip uıymdastyrdy.
2021 jylǵy 27 tamyzda Qazaqstan Respýblıkasy Táýelsizdiginiń 30 jyldyǵyna jáne Konstıtýsıa kúnine arnalǵan «Internet dáýiri: Quqyq ústemdigi, Adam qundylyqtary, Memlekettik Táýelsizdik» atty taqyrypta halyqaralyq sımpozıým onlaın rejımde óz jumysyn bastady, dep habarlaıdy Almaty-akshamy.kz «Aıqyn» basylymyna silteme jasap.
Halyqaralyq sımpozıýmdy Konstıtýsıalyq Keńes Tóraǵasy Qaırat Mámı ashyp, kez kelgen memlekette táýelsizdiktiń búkilhalyqtyq qundylyq ekenin atap ótti.
Respýblıkanyń qoldanystaǵy Konstıtýsıasy Táýelsizdik kontýryn túpkilikti resimdedi jáne barlyq salalardyń jedel damýy úshin qolaıly jaǵdaı jasady.
Qazaqstan Respýblıkasynyń Prezıdenti Q.K. Toqaevtyń quttyqtaýy is-sharaǵa erekshe mán berdi. Onda atap kórsetilgendeı, memlekettiń damýy Konstıtýsıa negizinde, onyń árpi men rýhyna tolyq sáıkes jalǵasyp keledi. Qazirgi zamanǵy memleket pen azamattyq qoǵam jolyndaǵy barlyq iri jetistikter halyqtyń erik-jigerimen qabyldanǵan Ata Zańǵa negizdelgen.
Memleket basshysy sımpozıým taqyrybynyń ózektiligin atap ótip, sıfrlyq damýdyń aýqymy men jyldamdyǵy halyqaralyq qoǵamdastyqtyń aldyna adam men azamattyń irgeli quqyqtary men bostandyqtarynyń saqtalýyn qamtamasyz etý, onyń zańdy múddelerin qorǵaý, sıfrlyq teńsizdikti joıý, qoǵam men memlekettiń sıfrlyq táýelsizdigin saqtaý sıaqty mańyzdy mindetter qoıyp otyrǵanyna nazar aýdardy.
Forýmnyń qonaqtary qazaqstandyqtardy Táýelsizdik mereıtoıymen quttyqtap, sımpozıýmdy tabysty ótkizgeni jáne Azıalyq qaýymdastyqqa oıdaǵydaı tóraǵalyq etkeni úshin Qazaqstan Respýblıkasynyń Konstıtýsıalyq Keńesine shynaıy rızashylyqtaryn bildirdi.