QR İshki ister mınıstri Erlan Turǵymbaev Táýelsizdiktiń 30 jyldyǵyna arnalǵan amnıstıa boıynsha qaı sanattar jáne qansha sottalýshy bosatylatynyn aıtyp berdi, dep habarlaıdy almaty-akshamy.kz QazAqparatqa silteme jasap.
Qazaqstan Táýelsizdiginiń 30 jyldyǵyna oraı, azamattarǵa jáne jalpy memleketke qaýip keltirmeıtin qylmys jasaǵan adamdarǵa amnıstıa jasaý sheshimi qabyldanǵan edi. QR İshki ister mınıstrligi «Raqymshylyq jasaý týraly» Qazaqstan Respýblıkasynyń zań jobasyn qoǵam talqylaýyna usyndy.
«Raqymshylyqqa ortasha jáne jeńil qylmys jasaǵan adamdar iligedi. Sosyn kámelet jasyna tolmaǵandar, kárilik jasyna jetkender, İ, İİ toptaǵy múgedekter men júkti jáne kámeletke tolmaǵan balalary bar áıelder sanaty naqty bekitilgen», - dedi E. Turǵymbaev Habar telearnasyndaǵy «Ulttyq múdde» baǵdarlamasynda.
Mınıstrdiń aıtýynsha, raqymshylyqpen myńǵa jýyq sottalýshy men probasıalyq baqylaýdaǵy 3 myńnan adam bosatylady.
«Sonymen birge, bul raqymshylyqtyń ekinshi bóligi – jaza merzimin azaıtýǵa arnalady. Osylaısha, jaza óteý oryndaryndaǵy 1300 adamnyń jáne probasıalyq baqylaýdaǵy 7 myń adamnyń jaza óteý merzimi azaıtylady. Onyń ishinde kámelet jasyna tolmaǵan 12 sottalýshynyń da merzimi azaıady. Jáne úshinshi bólik – óndiristegi qylmystyq isterge qatysty bolmaq. Qazirgi ýaqytta 5 myńǵa jýyq qylmystyq is qaralyp jatyr jáne raqymshylyqqa saı keletin baptar boıynsha 316 adam qamaýda otyr. Olar óz aıybyn moıyndap, raqymshylyqqa ótinim bere alady. Al eger ózderin jazyqsyz dep sanasa, tergeý amaldary ári qaraı jalǵasady», - dep túsindirdi E. Turǵymbaev.