Táýelsizdik – memleketimizdiń altyn dińgegi, derbestigimizdiń berik negizi
Qazaqstan Respýblıkasynyń Tuńǵysh Prezıdenti Nursultan Ábishuly Nazarbaevtyń «Táýelsizdik taǵylymy» atty maqalasy - Qazaqstannyń tarıhı tabystaryn zerdeleý qujaty. Al Táýelsizdiktiń qasterli tarıhyn paıymdaý - búginde qoǵamymyzda berik ornyqqan uly dástúr. Qazaqstannyń búkil álem tanyp, joǵary baǵalaǵan, óz halqy maqtan tutyp, kózdiń qarashyǵyndaı saqtap qurmetteıtin kúni.
Táýelsizdigimizdiń tabysty 30 jyldyǵy – Otanymyzdyń árbir azamaty úshin, árbir urpaǵy úshin baǵa jetpes ómirlik mańyzdy qundylyq. Al, Elbasy úshin halqynyń táýelsizdiginiń negizin qalaý jolyndaǵy mańdaı teriniń, «kúndiz bel jazbaı, túnde uıyqtamaı» etken eńbeginiń, qajymas-qaıtpas kúreskerliginiń, kemeńger kósemdiginiń jemisindeı beıneli perzenti.
«Qaz turyp, qadam basqan Táýelsizdik sábılik tusaýyn ómirsheń ýaqytta kestirgen kezden bastap, osynaý 30 jyldyń bederinde aıshylyq jerdi alty ret attaǵan alyp sekildi, dáýir jalyn myǵym ustap, tizginin bekem qaǵa bildi», - dep Elbasymyz Nursultan Ábishuly Nazarbaev aıtqandaı, ótkenin qadirleıtin, búginin qymbat tutatyn, erteńine senetin bizdiń Táýelsiz elimiz búginde búkil álem tanyǵan jan-jaqty qýatty memleketke aınalyp, eń damyǵan 30 el qataryna enýge baǵyt aldy.
Bul tabystarǵa Elbasymyz Nursultan Ábishuly Nazarbaevtyń óziniń kóregen de sara basshylyǵymen jettik.
Halqymyzda «Baǵalaı bilmegenge baq turmaıdy, qadirleı bilmegenge qut qonbaıdy» degen sóz bar. Elimizdegi kimniń bolsa da jerasty eńbeginen ǵaryshtyq dańqqa deıingi aralyqtaǵy mereıli tabysy Táýelsiz memleketimizdiń jemisi ekenin aıtý azamattyq nıetimizdiń adaldyǵyn bildirmek. Bizderdiń, qazaqstandyqtardyń, baǵymyz da, qutymyz da – uly Táýelsizdigimiz. El Táýelsizdigin baǵalap, qadirlep, urpaqtan urpaqqa abyroıyn asqaqtatyp amanat etip tapsyryp otyrý paryzy – bárimizdiń de baqytymyzdyń qaınar kózi. Ol Qazaqstan taǵdyrymen árqaısysymyzdyń taǵdyrymyzdyń birtutas birliginen týyndaıdy.
Qazaqstan Respýblıkasynyń Táýelsizdik tuǵyrynyń beriktigi men eldigimizdiń tutastyǵy Elbasymyz, egemendi elimizdiń Tuńǵysh Prezıdenti N.Á.Nazarbaevtyń sarabdal saıasatynyń arqasy ekendigi barshamyzǵa aıan. Qazaqstan – birtutas jer, birtutas halyq, birtutas bolashaq desek, Elbasy N.Á.Nazarbaev búkil sanaly ǵumyrynda Qazaqstan halqynyń baqytty ómiri, baıandy bolashaǵy úshin bar qajyr-qaıratymen eńbek etti. Ótkenimizdi saralaı qarasaq, Elbasynyń syndarly saıasatynyń arqasynda Qazaqstan taıǵaq keshýlerden súrinbeı ótip, bedeldi de abyroıly, álemdik qaýymdastyq moıyndaǵan, jedel damýdyń dańǵyl jolyna túsken elderdiń qataryna endi.
Táýelsizdigimizdi baıandy etý, elimizdiń jarqyn bolashaǵy úshin qyzmet etý – bárimizdiń asyl boryshymyz ekendigi daýsyz.
Táýelsizdik – memleketimizdiń altyn dińgegi, derbestigimizdiń berik negizi.
Danyshpan halqymyzda «El tarıhy – er tarıhy» degen sóz bar. Qazaq uǵymynda el men er - birtutas álem. Árbir perzent kishkentaıynan el ortasynda ósedi, el kózinde tárbıelenedi.
Táýelsizdigimizdiń otyz jylynda el tarıhyn jasaǵan Elbasymyz Nursultan Ábishulynyń da er tarıhy jasaldy dep túsinemin.
«Óziń úshin týyp, eliń úshin izdenip, ólsheýsiz ter tógý, erlik jasaý, bul – máńgi ólmes tirlik, óshpes shyn erlik», - dep Memlekettik syılyqtyń ıegeri, Qazaqstan Halyq jazýshysy, aqyn Hamıt Erǵalıev aıtqandaı, Táýelsizdigimizdiń jetistigi - Elbasymyzdyń eren eńbeginiń jemisi.
Elbasy N.Á.Nazarbaevtyń Nur Otan partıasy Saıası keńesiniń keńeıtilgen otyrysynda (23.11.2021 jyl.) «Eldiktiń jeti tuǵyry» atty qaǵıdattar jıyntyǵyn jarıalady.
«Álem qartasynda Qazaqstan degen egemen eldiń oıyp turyp oryn alýy úshin aıanbaı eńbek ettik. Endigi kezekte osy jetistigimizdi eselep arttyrý el yntymaǵy men tutastyǵyna baılanysty. Otyz jylda 9,5 mıllıonnan astam sábı dúnıege keldi. Olardyń aldyńǵy shebi orda buzar otyzǵa tolyp otyr. Bul – kózi ashyq, kókiregi oıaý, sanasy azat, oıy ozyq jańa býyn. Memlekettilikti saqtap, Qazaqstandy «Máńgilik El» etý osy urpaqqa júkteletin tarıhı mısıa dep sanaımyn», - dedi Tuńǵysh Prezıdentimiz Nursultan Ábishuly. Bul jas urpaqqa joldaǵan úndeýi aldaǵy ýaqytta jarǵylyq basshylyq bolatynyna senemin. Bul Táýelsizdigimizdiń altyn tirekteri bolary sózsiz.
Sózimdi qorytyndylaı kele, Nursultan Ábishulynyń densaýlyǵynyń myqty bolýyna, qýat-kúshin áli de halyq ıgiligine jumsaı berýine, eńbeginiń jeńisteri men jemisterin halqymen birge kórýine tilektestigimdi bildiremin.