Aqorda rezıdensıasynda Qazaqstan astanasyna memlekettik saparmen kelgen Ózbekstan Prezıdenti Shavkat Mırzıóevti saltanatty qarsy alý rásimi ótti
Qurmet qaraýyly rotasynyń bastyǵy memleketter basshylaryna raport bergennen keıin eki eldiń ánurandary oryndaldy, dep habarlaıdy Almaty-akshamy.kz Akorda.kz-ke silteme jasap
Budan keıin Qasym-Jomart Toqaev pen Shavkat Mırzıóev Shyǵys zalynda shaǵyn quramda kelissóz ótkizdi.
Qazaqstan men Ózbekstan basshylary ekijaqty strategıalyq seriktestiktiń keń aýqymdy máselelerin talqylady. Atap aıtqanda saıası, saýda-ekonomıkalyq, ınvestısıalyq, kólik-tranzıttik, mádenı-gýmanıtarlyq yntymaqtastyq sıaqty negizgi aspektiler qarastyryldy. Sondaı-aq aımaqtaǵy, sonyń ishinde, qaýipsizdikti qamtamasyz etý jáne kópjaqty qurylymdar aıasyndaǵy ózara is-qımyl máseleleri sóz boldy.
Qasym-Jomart Toqaev qazaq-ózbek yntymaqtastyǵyn jańa deńgeıge kóterý turǵysynan, Shavkat Mırzıóevtiń qazaq jerinde ótip jatqan memlekettik saparynyń mańyzdy ekenin atap ótti.
– Biz búgin odaqtastyq qatynastar týraly Deklarasıaǵa qol qoıamyz. Buǵan deıin strategıalyq seriktestik qaǵıdalaryna súıenip kelgen bolsaq, aldaǵy ýaqytta bizdiń ózara qarym-qatynastarymyz shyn mánindegi jańa deńgeıge kóteriledi. Sondyqtan búgin qol qoıylatyn qujattar elderimizdiń arasyndaǵy yntymaqtastyqqa tyń serpin beredi dep esepteımin. Biz úkimetterimizge jaqyn arada saýda kólemin 5 mıllıard dollarǵa, keıinirek 10 mıllıard dollarǵa deıin jetkizý týraly tapsyrma berýge ýaǵdalastyq. Bul óte joǵary deńgeı, – dedi Memleket basshysy.
Qazaqstan Prezıdenti aımaqtaǵy turaqtylyq pen qaýipsizdikti qamtamasyz etý isindegi eki memlekettiń róli týraly aıtty.
– Elderimiz arasyndaǵy odaqtastyq, strategıalyq qarym-qatynastar – Ortalyq Azıa aımaǵyndaǵy turaqtylyq pen qaýipsizdikti qamtamasyz etýdiń mańyzdy faktory. Bul eshqandaı artyq aıtqandyq emes. Eki el arasyndaǵy baılanystar qanshalyqty tyǵyz bolsa, bizdiń mańyzdy aımaqtaǵy ahýal da sonshalyqty turaqty bolady, – dedi Qasym-Jomart Toqaev.
Shavkat Mırzıóev qazaq jerinde kórsetilgen dástúrli qonaqjaılyq úshin rızashylyǵyn bildirip, óziniń jáne ózbek halqynyń atynan Qasym-Jomart Toqaevty jáne Qazaqstan halqyn Táýelsizdiktiń 30 jyldyq mereıtoıymen quttyqtady.
Ózbekstan basshysy Qazaqstan Prezıdentiniń basshylyǵymen elimizdiń jetken jetistikterin joǵary baǵalady. Sondaı-aq ol ekijaqty qatynastardyń damýyna Elbasy Nursultan Nazarbaevtyń zor úles qosqanyn atap ótti.
Ózbekstan Prezıdenti óziniń memlekettik sapary Qazaqstan Táýelsizdiginiń 30 jyldyǵy qarsańynda ótip jatqanynyń sımvoldyq máni bar ekenin aıtty. Ol eki el halyqtarynyń arasyndaǵy ǵasyrlar boıy qalyptasqan dostyq qarym-qatynastar memleketaralyq baılanystardy nyǵaıtýǵa zor septigin tıgizetinine senim bildirdi. Sondaı-aq eki el úkimetteriniń osy sapar qarsańynda atqarǵan nátıjeli jumystaryn atap ótti.