Til adamdardyń qarym-qatynas quraly bolǵandyqtan, ol sóıleý áreketiniń arqaýy bolyp tabylady. Til – ult pen ultty jaqyndastyratyn ózgeshe qatynas quraly. Adam til arqyly bir-birimen qatynasa alady. Ult ustazy A. Baıtursynulynyń «Ulttyń saqtalýyna da, joǵalýyna da sebep bolatyn nárseniń eń qýattysy – til»,-dep tilimizdiń saqtalýyna erekshe baǵa bergen.
Almaty qalasynyń Naýryzbaı aýdany №176 mektep-gımnazıasynda qazaq tili men ádebıeti páni birlestiginiń uıymdastyrýymen 5 qyrkúıek – Qazaqstan halqy tilderi kúni merekesine oraı «Tilim meniń – tiregim» atty ádebı kesh ótti. Mektebimizdiń oqýshylary Ana tiliniń qasıeti, qudireti arqyly talaı tamasha týyndylardy dúnıege ákelgen sóz sheberleriniń týǵan tiline arnaǵan jyr joldaryn mánerlep oqydy. Atap aıtar bolsaq, 8 «D» synyp oqýshysy Quttyǵalıeva Aqerke «Qazaq tili», 8 «A» synyp oqýshylary Serikhan Ǵazıza, Esen Káýsar, 8 «G» synyp oqýshysy Erkin Araı, 7 «D» synyp oqýshysy Jumaǵul Arýjan, 9 «G» synyp oqýshysy Sádýaqas Islam, 6 «G» synyp oqýshylary Táńirbergen Erasyl, Tursynhan Erasyl, 5 «V» synyp oqýshysy Rysqulbek Aıaýlym aqyn óleńderin mánerlep oqydy.
Ádebı kesh barysynda oqýshylarǵa «Til taǵdyry – ult taǵdyry» fılminen úzindi kórsetilip, 8-9-synyp oqýshylary ult zıalylarynyń til týraly qanatty sózderin oqydy. Qazaq tili men ádebıeti pán birlestiginiń ustazdary ana tilimiz jaıynda óleń shýmaqtaryn mánerlep oqyp, oqýshylardy tilimizdi shubarlamaýǵa, ana tilimizdi qurmetteýge, mártebemin bıik ustaýǵa shaqyrdy. Ádebı keshte kórermenderge kúmbirlegen kúıimen boıǵa shabyt syılaǵan mektebimizdiń kúıshi oqýshylary óz ónerlerin kórsetse, myń buralǵan «Shashý» bı toby keshimizdiń sánin keltirdi.
Mektep-gımnazıa dırektory Nurjamal Esirkepovna men dırektordyń oqý-tárbıe isi jónindegi orynbasary Abylaı Kópbergenuly sóz kezegin alyp, oqýshylarǵa ana tiliniń memleket úshin mańyzyn aıta kelip, ádebı keshti joǵary deńgeıde uıymdastyrylǵan rýhanı azyq bolatyn kesh boldy dep óz baǵasyn berdi. Kesh sońynda ustazdarymyz «Jasa, Qazaqstan» ánin oryndap, keshtiń núktesin qoıdy. Ananyń aq sútimen, ájeniń áldıimen boıymyzǵa daryǵan ana tilimizdi ardaqtaı bileıik! Týǵan tilimiz egemendigimizdiń belgisine, táýelsizdigimizdiń sımvolyna aınalsyn!