Ahmet Baıtursynov atyndaǵy №139 mektep-gımnazıada qoǵamdyq-gýmanıtarlyq pánder kafedrasynyń uıymdastyrýymen «Táýelsiz eldiń tiregi – til men tarıh» taqyrybynda onkúndik ótti. Bul sharanyń maqsaty – oqýshylarǵa til men tarıhtyń qoǵamdaǵy jáne memlekettiń damýy úshin qanshalyqty mańyzdy ekenin túsindirý, ulttyq murany saqtap, ony bolashaq urpaqqa jetkizý.
Onkúndik barysynda oqýshylardy ulttyq murajaıǵa aparyp, elimizdiń tarıhymen tanystyrý maqsatynda ekskýrsıa uıymdastyryldy. Murajaıdaǵy túrli jádigerler, tarıhı tulǵalar týraly mol maǵlumat alý arqyly oqýshylar qazaq halqynyń baı tarıhyn tereńirek túsindi. Bul ekskýrsıa olardyń ulttyq qundylyqtar men mádenıetke degen qyzyǵýshylyǵyn arttyrdy. Sonymen qatar, onkúndik aıasynda ashyq sabaqtar men ıntellektýaldy oıyndar ótkizilip, oqýshylardyń tanymdyq qabiletteri synaldy. Oqýshylar qazaq tiliniń baılyǵyn, sózdik qoryn paıdalanyp, ártúrli tapsyrmalardy oryndaldy. Bul oraıda, ulttyń tarıhy men tiliniń bir-birimen tyǵyz baılanysty ekeni aıqyn ańǵarylady. Intellektýaldy oıyndar men shyǵarma taldaýlarynda oqýshylar tarıhqa qatysty suraqtar men taqyryptarǵa jaýap berip, qazaq halqynyń uly tulǵalary men el tarıhyndaǵy eleýli oqıǵalardy eske túsirdi. Osyndaı is-sharalar jas býynnyń tarıhı sanasyn qalyptastyrýǵa jáne olardyń óz eliniń mádenıetin qasterleýge baǵyttalǵan mańyzdy qadam boldy.
Onkúndiktiń taǵy bir mańyzdy bóligi – mektepishilik «Elsana» gazetinde oqýshylardyń til men tarıhqa qatysty maqalalary, pikirleri men shyǵarmashylyq jumystarynan úzindiler jarıalandy. Bul basylym oqýshylardyń jazý mádenıetin damytýǵa jáne olardyń qoǵamdyq pikirge qosqan úlesin baǵalaýǵa múmkindik berdi. Onkúndik aıasyndaǵy úlken is-shara «Úzdiksiz úderister: oqý jáne oqytý ádisterindegi revolúsıa» taqyrybyndaǵy qalalyq semınar ótti. Semınarǵa ár aýdannan pedagogtar qatysyp, qazaq tili muǵalimderiniń is-tájirıbesimen tanysyp, tájirıbe jınaqtap qaıtty. Semınarda ádebıetti oqytýdyń tıimdi ádis-tásilderi kórsetilip, oqýshylardyń boıynda ulttyq sanany qalyptastyrý joldary talqylandy.