Oqýshylar saraıynda qalalyq Bilim basqarmasynyń uıymdastyrýymen mektep basshylarynyń qatysýymen keńeıtilgen jıyn ótti. Jıyn barysynda ınklúzıvti bilim berý jáne quqyqbuzýshylyqtyń aldyn alý sıaqty ózekti máseleler keńinen sóz bolyp, basqa da máseleler talqylandy.
Kezdesýde erekshe bilim berý qajettilikteri (EBQ) bar balalarǵa arnalǵan ınklúzıvti bilim berýdi damytý jáne osy saladaǵy monıtorıń nátıjeleri negizgi taqyryp boldy. Alǵashqy sóz kezegin qalalyq Bilim basqarmasynyń basshysy Saıran Saıfedenov alyp, jıynnyń mańyzdylyǵyna toqtady.
– Memleketimiz erekshe bilim berýdi qajet etetin balalalarǵa barynsha qoldaý kórsetip otyr. Arnaıy oqý baǵdarlamalary ázirlendi. Bul – ata-anaǵa zor kómek qana emes, erekshe balanyń emdelip, qajetti daǵdylardy ıgerýine yqpalyn tıgizedi. Sonymen qatar, muǵalimnen basqa balanyń oqý materıalyn ıgerýge kómektesetin, psıhologıalyq jáne áleýmettik máselelerdi sheshetin kómekshisi bolady. Bul sharalar múmkindigi shekteýli balalarǵa ózderin qoǵamnyń tolyqqandy qatysýshylary retinde sezinýge, damýǵa jáne aınalasyndaǵylarǵa paıdaly bolýǵa múmkindik beredi. Inklúzıvti bilim berýdi damytý – múmkindigi shekteýli balalarǵa ǵana emes, búkil bilim berý júıesine arnalǵan bilim berýdi damytý. Bul barlyǵyna teń quqyqta jáne teń jaǵdaıda bilim alýǵa múmkindik beredi. Sondyqtan, ereksheligi bar balalardy qoǵamnan bólektemeı, qoldan kelgenshe qoldaǵan durys, - dedi basqarma basshysy.
Sondaı-aq oqýshylar arasyndaǵy quqyqbuzýshylyqtyń aldyn alý sharalary, mektepterdiń qaýipsizdigin qamtamasyz etý jáne tárbıe jumysyn jetildirý máseleleri de jan-jaqty sóz boldy.
– Qazirgi tańda qala ákimi Erbolat Dosaevtyń qoldaýymen, ınklúzıvti qala qaǵıdattaryn engizý aıasynda, memlekettik jáne jekemenshik bilim berý mekemelerinde barlyq oqýshylarǵa teń múmkindik jasaý úshin qajetti jaǵdaılar jasalyp jatyr. Biz árbir balany nazardan tys qaldyrmaýymyz kerek. Mektep – balalardyń ekinshi úıi. Olar jaıly jáne qaýipsiz ortada bilim alyp, damýy qajet, – dedi Saıran Saıfedenov.
Kezdesý qorytyndysy boıynsha erekshe bilim berý qajettilikteri bar balalarǵa qolaıly oqý jaǵdaılaryn jasaý, kámeletke tolmaǵandar arasyndaǵy quqyqbuzýshylyqtyń aldyn alý sharalaryn kúsheıtý jáne bilim berý salasyndaǵy qarjylyq tártipti qamtamasyz etý jóninde naqty usynystar ázirlendi.
Sondaı-aq keńes jumysyna qalalyq polısıa departamentiniń ıývenaldy polısıa ókilderi jáne basqa da múddeli qurylymdar qatysty. Qatysýshylar ınklúzıvti bilim berýdiń ınfraqurylymdyq, ádistemelik jáne kadrlyq máseleleri de jan-jaqty talqylandy.