"Jaqsy adam - el yrysy, jańbyr jaýsa - jer yrysy" degen eken dana halqymyz. Qazaq sportynyń damýyna zor úlesin qosqan taý tulǵaly azamattar kóp ekenin bilemiz. Solardyń ishinde basshylyq qyzmette júrip, qolynan kelgen jaqsylyǵyn qazaq sportynyń órkendeýine, keshendi ǵırattardyń boı kóterýine súbeli úlesin qosqan iri tulǵanyń biri Karken Ahmetov dep aıtar edik.
Ol kisiniń tikeleı basshylyǵymen Almatyda Ortalyq stadıon, Medeý muz aıdyny men qosa kóptegen sport ǵımrattary salynǵanyn bireý bilse, bireý bilmes. Sonymen qatar, Karken Ahmetuly tusynda qazaqstandyq sportshylar sporttyń ár túrinen kóptegen iri halyqarylyq jarystarda báıgeli bolyp, Qazaqstannnyń atyn álemge tanymal etti.
Búginde Almatydaǵy olımpıada rezerviniń respýblıkalyq mamandandyrylǵan mektep-ınternat-kolledji keńpeıildi kemel basshy, bilgir maman, ardaqty tulǵa, qoǵam qaıratkeri Kárken Ahmetuly Ahmetovtyń atymen atalady. Bul mektepten aty álemge tanylǵan sportshylardyń qatary qalyń. Soladyń biri ári biregeıi - Olımpıada oıyndarynyń kúmis júldegeri Eldos Smetovti aıtsa, jetip jatyr. Aıtýly mektep-ınternat kolejdiń qabyrǵasynda áıgili tulǵany eske alýǵa arnalyp uıymdastyrylǵan dodaly jarystyń maqsaty da sol jas urpaqqa altynnyń synyǵy Kárken Ahmetovtiń kim bolǵanyn eske ala otyryp, jas býynnyń sportqa elge degen kózqarasyn jaqsarta túsý bolǵan eken.
Jýyrda dzúdo akademıasynda memleket jáne qoǵam qaıratkeri, qazaq sportynyń janashyry Kárken Ahmetovti eske alýǵa arnalǵan kadetter arasynda respýblıkalyq týrnır bolyp ótti. Bul jarysty ótkizýge QR Mádenıet jáne sport mınıstrligi Sport jáne dene shynyqtyrý isteri komıtetiniń Kárken Ahmetov atyndaǵy olımpıada rezerviniń respýblıkalyq mamandandyrylǵan mektep-ınternat-kolledji muryndyq boldy. Týrnırge qurmetti qonaq retinde Kárken Ahmetovtiń tuǵan uly Nurlan Kárkenuly jáne dzúdo kúresinen kóptegen sport sańlaqtaryn baptaǵan QR Eńbek sińirgen jattyqtyrýshylary – Jeksenbaı Salamatov, Seıdolla Kalıev, Dúısen Aıazbekov jáne Tólegen Sultanovtar kelip qatysty.
Jarysqa «Shańyraq» shaǵynaýdanyndaǵy olımpıada rezerviniń respýblıkalyq mamandandyrylǵan mektep-ınternat-kolledji men onnan astam sport klýbynan kelgen 100-den asa tatamı sheberleri 9 salmaq dárejesi boıynsha ózara myqtyny anyqtady. Kárken Ahmetov atyndaǵy sport mektebiniń jas sportshylary bul jarysta joǵary nátıje kórsetti. Syn alańynda óner kórsetken 6 salmaqta alań ıeleri 6 altyn, 1 kúmis 3 qola medaldi jeńip aldy .
Sonymen altyn alqalardy Ǵabıt Rasýlhan (46 kg), Nurasyl Pan (50 kg) aldy.
I oryndy Altynbek Konysbaı (55 kg), Muhametáli Jylqaıdyr (60 kg), Dıas Ihsanov (66 kg), Batyrhan Toqtarlar (+73) jeńip alsa, jalǵyz kúmisti 55 kg salmaqta Aıdyn Shúkirbek ıelendi. Al júldeli qola medaldar Marhanbet Janarys (42 kg), Qurban Orazaqynov (60 kg), Nurdos Dosbergenniń (60 kg) enshisine tıdi.
Jarys sońynda qadirli qonaqtarǵa estelik syılyqtar tabystalyp, jeńimpazdar men júldegerler marapattaldy. Osyndaı jarystar daryndy balýandardyń shyńdalyp ósýine zor yqpal bereri sózsiz. Aldaǵy ýaqytta bul týrnır halyqaralyq deńgeıge kóterilip jatsa, nur ústine nur bolar edi.