Retteletin qyzmetterge belgilenetin tarıfter nelikten sharyqtap ketti jáne olardyń ósýi jyldyq ınflásıaǵa qalaı áser etti?
QR UB Aqsha-kredıt saıasaty departamenti dırektorynyń orynbasary Denıs Chernávskıı osy suraqqa jaýap berdi, dep habarlaıdy Almaty-akshamy.kz QazAqparat saıtyna silteme jasap.
«Tutyný baǵasynyń ındeksin qalyptastyrý kezinde retteletin komýnaldyq qyzmetter (sýmen jabdyqtaý jáne sý tartý júıesi, gazben jabdyqtaý, elektrmen jabdyqtaý, jylýmen jabdyqtaý) aıtarlyqtaı eleýli ról atqarady. 2021 jyly tutyný sebeti qurylymyndaǵy olardyń úlesi 6% boldy.
Tıisinshe, tarıf dınamıkasy ınflásıaǵa tikeleı áser etedi, ıaǵnı, janama túrde – óndirilgen taýarlar men qyzmetter qunynyń ósýi arqyly yqpal etedi. 2018-2019 jyldary Qazaqstanda sol ýaqytqa deıin uzaq merzimdi tarıftik josparlarǵa engizilmegen komýnaldyq qyzmetterdiń tarıfi edáýir tómendetilgen bolatyn. Bul jalpy ınflásıaǵa deınflásıalyq turǵyda áser etken qyzmetterge baǵanyń tarıhı azdap ósýine múmkindik berdi. Alaıda retteletin qyzmetter baǵasynyń bir sáttik tómendeýi jáne olardy tómen deńgeıde saqtaý – keıinge qaldyrylǵan ınflásıa qaýpin týdyrýǵa, ıaǵnı, orta merzimdi perspektıvada tarıfterdiń jıi ári oqystan ósýine jol beredi. Qazirgi tańda biz tarıf belgileýde teńgerimsiz saıasattyń saldaryn sezinip otyrmyz. Turaqty ınflásıa men qolaıly ekonomıkalyq konúnktýra kezinde retteletin qyzmetterdiń tarıfin ákimshilendire tómendetýdiń arqasynda tabıǵı monopolıserdiń kirisi tómendedi.
Bunyń izin ala retteýshi memlekettik organdar shekti tarıfterdi arttyrýǵa májbúr boldy. Bıyl qarasha aıynda tarıfter jyldyq esepte 3,1%-ǵa ósti, eń kóp óskeni – elektr qýaty tarıfi (8,6%) men gaz tarıfi (5,5%)» dep atap ótti Denıs Chernávskıı.
Onyń sózine qaraǵanda, sh ekti tarıfterdiń bir mezette aıtarlyqtaı qymbattaýy onyń aldynda alynbaı qalǵan kiristi eseptegende, ekonomıkada aıtarlyqtaı ınflásıalyq qysym jasap, qubylmaly ınflásıany arttyrady. Solaı bola tura, koronadaǵdarys, sonyń ishinde, jahandyq ınflásıa men teńgegiń álsireýi saldarynan jaǵdaı odan saıyn qıyndaı túsedi.
«Óz kezeginde tarıfterdiń ósimin keıinge shegerý ishinara ınflásıany shekti bekitilgen dálizge saı turaqty ınflásıa qalyptastyrýǵa kedergi jasap, Ulttyq Bank júrgizip otyrǵan saıasattyń tıimdiligin tómendetedi. Bul mańyzdy másele 2030 jylǵa deıingi Aqsha-kredıt saıasatynyń strategıasy aıasynda qozǵalǵan. Ulttyq Bank negizgi qarajatty jańartyp, baǵalardyń bir mezette qymbattaýynan bolatyn jaǵymsyz saldardy barynsha azaıtý úshin tabıǵı monopolıalardyń tarıfine shekti jyldyq ósim ornatý jón bolady dep sanaıdy. Qyzmetterdiń baǵasy baıaý ári boljamǵa sáıkes ósse, ol ınflásıalyq boljamdardy azaıtyp, jalpy, ınflásıa deńgeıin kidirtýge múmkindik beredi», - dep túıindedi spıker.