Merekege qaramaı jumys isteıtinder kimder?
Bizdiń qoǵamda mańyzy zor, aýadaı qajet mamandyq ıeleri bar. Olar bul kúni kezekshilikke túsip, saǵat 00.00-de jumysta bolady. Biri úlken mindetti arqalasa, biri tabys tabýdy kózdeıdi. Jańa jyl túninde tynymsyz qyzmet etetin mamandardyń birazyn jipke tizsek, dep habarlaıdy Almaty-akshamy.kz Elorda.info-ǵa silteme jasap.
Polısıa qyzmetkerleri
Mereke kúnderinde polıseılerdiń qyzmettik jaýapkershilikteri tipten údeı túsedi. Jańa jyl túni qyzyq pen qylmys qatar júretini belgili. Ashshy sýǵa toıyp alǵan adamdar minez kórsetip, toıdyń sońyn tóbeleske ulastyrady. Sonymen qatar alańdaǵy shyrsha mańy, buzaqylar, qoǵamdaǵy keleńsiz jaǵdaılardyń suraýy osy mamandyq ıeleriniń moınynda.
"Jedel járdem"
Aýrý-syrqaý merekege qaramaıdy. Adam ómiri dárigerlerdiń qolynda bolǵandyqtan, bul mamandyq ıeleriniń Jańa jyldy jumysta qarsy alýy tańǵalatyn dúnıe emes. Tipti, "jedel járdem" kóliginiń ishinde de qarsy alatyn kezderi bolady.
«Jańa jyl túnin "jedel járdem" qyzmetkerleri de qyzý jumys ústinde ótkizedi. Byltyr Jańa jylda kezekshilikke shyqtym. Tynysh ótti deýge kelmeıdi. Jarty saǵat qalǵanda, jedel qońyraý tústi. Kórsetilgen mekenjaıǵa jetip, Jańa jyldy tanymaıtyn adamdarmen qarsy aldym. Negizi birinshi qańtarda shaqyrtýlar sany kóp bolady, merekelik dastarhannan keıin sozylmaly aýrýlary asqynyp ketedi», - dedi "jedel járdem" qyzmetkeri Mádına Ospanova.
Taksıster
Taksıster bul kúni jaqsy tabys tabady. Júrgizýshiler ádettegideı asyqqan jolaýshylardy dittegen jerlerine jetkizedi, biraq aqysy, árıne, joǵary.
«Jańa jyl qarsańynda taksıshilerdiń tabysy eki esege deıin ósedi. Sondyqtan 31 jeltoqsan kúni tolyq jáne túngi 23:50 shamasyna deıin yńǵaıy kelse jumys isteýge tyrysam. Osydan 3 jyl buryn úıge 00.15-te áreń degende jettim», - dedi taksıst Jandos Omarov.