Tıyndar úsh nusqada jasalǵan
QR Ulttyq Banki táýelsizdik jyldary koleksıalyq monetalardyń 600-den astam túrin shyǵardy. Olardyń árqaısysy biregeı. Keıbireýleri ótkennen syr shertip, tarıhı tulǵalar men oqıǵalarǵa arnalsa, endi bireýleri memlekettik merekelerge oraılastyrylǵan. Máselen, qarjy ınstıtýty 2021 jyldyń basty mereıtoıy - el Táýelsizdiginiń 30 jyldyǵyna tartý retinde arnaıy monetalar ázirlegen, dep habarlaıdy Almaty-akshamy.kz
Aıta keteıik, bul tıyndar úsh nusqada jasalǵan. Nomınaly 5 myń jáne 5 júz teńgelik – kúmisten, 100 teńgelik melhıordan quıylǵan. Dızaınerlerdiń aıtýynsha, olarǵa 1993 jylǵy úlgidegi otandyq banknottardyń birinshi serıasynda kirgen kórnekti tarıhı tulǵalar basylǵan. Qas betindegi portrettik qatardyń eń aldynda Tuńǵysh Prezıdent, Elbasy – Nursultan Nazarbaev beınelengen. Ulttyq Bank monetalar biregeı tehnologıamen jasalǵanyn aıtady.
«Bul monetalardy ázirleý barysynda birden úsh tehnologıa qoldanyldy. Atap aıtsaq, kartalardy altynmen jalatý, portrettik qatar jáne sandyq úlgide basyp shyǵarý ádisi. Joǵaryda tý ornalasqan. Eger muqıat qarasańyz, ınterferensıalyq kempirqosaq jabyny bar. Iaǵnı kıiz úıdi bezendirý kezinde jasalatyn sándik qoldanbaly óner – basqur banknottyń negizgi elementteriniń biri boldy. Salmaǵy 31,1 gramdy quraıtyn monetalar taralymǵa úsh myń danamen shyqty», - deıdi QR Ulttyq Bankiniń banknottar men monetalardy jobalaý basqarmasynyń bastyǵy Almat Qasenov.
.