Memlekettik retteýge jatatyn ólshemder tizbesi saýda-kommersıalyq operasıalar kezindegi taýarlar salmaǵynyń ólshemderimen tolyqtyryldy, dep habarlaıdy Almaty-akshamy.kz BAQ.KZ-ke silteme jasap.
Salystyryp tekserýdiń máni ólshem quraldarynyń mindetti metrologıalyq talaptarǵa sáıkestigin rastaý bolyp tabylady. Ol úshin atestattalǵan salystyryp tekserý ádistemesi paıdalanylady, birqatar is-sharalar júzege asyrylyp, nátıjesinde oń nátıjeleri salystyryp tekserý tańbasynyń bederimen kýálandyrylady, al teris jaǵdaıda ólshem quralynyń jaramsyzdyǵy týraly habarlama jiberiledi. Rásimniń shyǵyny kóp emes, sarapshylardyń baǵalaýy boıynsha naryqtaǵy ortasha eseppen 5000 teńgeden sırek asady jáne arnaıy girlerdi paıdalanýdy kózdeıdi.
Ózgerister «Ólshem birligin qamtamasyz etý týraly» zańnyń qoldanystaǵy erejelerine negizdelgen, ol memlekettik metrologıalyq baqylaý obektileriniń ishinde saýda operasıalaryn jasaý kezinde ıelikten shyǵarylatyn ónim sanyn tikeleı anyqtady, jáne de ishki saýda erejelerine sáıkes saýda obektisi qajetti saýda qural-saımanymen, jabdyǵymen, onyń ishinde !Ólshem birligin qamtamasyz etý týraly» Zańnyń talaptaryna sáıkes qoldanýǵa ruqsat etilgen ólshem quraldarymen qamsyzdandyrylady.
Osylaısha, salmaǵy boıynsha ónimdi satý kezinde tutynýshylar ólsheýdiń anyq emes nátıjelerinen Zańmen qorǵalady jáne olar aqysy tólengen salmaqty ala alady. Saraptamalyq baǵalaýlar boıynsha salystyryp tekserýge usynylatyn ólshem quraldarynyń shamamen 8-10 %-y odan ótpeıdi, sol arqyly jaramdy bolyp tabylmaıdy.
Zań talaptaryn saqtamaǵany úshin «Ákimshilik quqyq buzýshylyq týraly» kodekstiń 419-babynda jeke (30 AEK) jáne zańdy tulǵalarǵa (230 AEK-ten 600 AEK-ke deıin) aıyppul túrinde jaýapkershilik qarastyrylǵan.
Shara pisip jetilgen, ol kezinde «kózden tasa boldy» dep aıtýǵa bolady jáne baqylaý 4 jyldan astam ýaqyt júrgizilmegen. Mınýt saıyn búkil el boıynsha myńdaǵan saýda nysandarynda tutynýshylar túrli jaǵdaıdaǵy tarazylarǵa «qaramaı» senip, ólsheýlerdiń tekserilmegen nátıjeleri úshin óz qarajattaryn tóleı beredi. Azamattardyń shaǵymdary kelip túsedi. Salystyryp tekserý tarazynyń dáldigin, tutynýshylardy qorǵaýdy jáne aldamshy tájirıbelerdi azaıtýdy qamtamasyz etedi, - dep atap ótti SIM Tehnıkalyq retteý jáne metrologıa komıtetiniń tóraǵasy Qýanysh Elikbaev.
Jańashyldyq aýylsharýashylyq jármeńkelerge qoldanylmaıdy dep qosty saýda mınıstrligi.