Bıyl Sherhan Murtazanyń týǵanyna 90 jyl tolyp otyr.
Bul týraly Premer-Mınıstr Álıhan Smaıylovtyń Senat depýtattary joldaǵan saýalyna bergen jaýabynda aıtylǵan, dep habarlaıdy Almaty-akshamy.kz Egemen.kz silteme jasap.
«Bıyl qazaq ádebıeti men jýrnalısıka salasynda óshpes iz qaldyrǵan belgili qalamger Sherhan Murtazanyń týǵanyna 90 jyl tolyp otyr. Jazýshynyń el múddesi úshin atqarǵan eńbegi memleket tarapynan joǵary qurmetke laıyq. Bul rette qoldanystaǵy «Mereıtoılar men ataýly kúnderdi merekeleý týraly» Úkimet qaýlysyna sáıkes jekelegen tulǵalardyń mereıtoılary alǵashqy júz jyldyqta – júz jyldyǵy, odan keıingi júzjyldyqtarda árbir jıyrma bes jylda atalyp ótedi. Osy oraıda Sh.Murtazanyń mereıtoıy zańnamaǵa sáıkes merzim tolǵan kezde mereıtoılar tizbesine engizilip, tıisti jumys júrgiziletin bolady», - dep atap ótti Úkimet basshysy Senat depýtattarynyń saýalyna bergen jaýabynda.
Degenmen, onyń dereginshe, búgingi kúni tulǵanyń esimin ulyqtaý maqsatynda birqatar is-sharalar júzege asyrylýda. Atap aıtqanda Sh.Murtazanyń esimi Jambyl men Túrkistan oblystarynda 6 obektige (bilim berý, mádenıet mekemeleri), Aqtóbe oblysy men Almaty qalasynda kóshelerge berilgen. Al Nur-Sultan qalasy kósheleriniń birine Sh.Murtazanyń esimin berý týraly usynys osy 15 maýsymda ótken Nur-Sultan qalasy máslıhaty kópshilik tyńdaýlarynda qoldaý taýyp, budan ári qoldanystaǵy zańnama talaptaryna sáıkes tıisti jumys júrgizilip jatyr.
«Al bilim mekemeleriniń birine jazýshy esimin berý usynysy aldaǵy ýaqytta ótetin qalalyq onomastıka komısıasynyń otyrysyna engiziledi. Sondaı-aq týǵan jeri Jambyl oblysy Jýaly aýdany, Talapty aýylynda Sherhan Murtaza ádebı-memorıaldyq úıiniń ashylýy, «Aýyldy, seni saǵyndym...» atty Sh.Murtazanyń qoljazbalary jınaǵynyń tusaýkeseri, respýblıkalyq ǵylymı-praktıkalyq konferensıa, «Sherhan oqýlary» baıqaýy, oblystyq aqyndar aıtysy, ulttyq sport túrlerinen jarystar, saltanatty jıyndar, «Shynnyń júzi - Sheraǵa» respýblıkalyq aqyndar músháırasyn jáne Nur-Sultan men Almaty qalalaryndaǵy ulttyq kitaphanalarda tulǵanyń kitap kórmesi men dóńgelek ústel, Almaty qalasynyń ortalyqtandyrylǵan kitaphana júıesinde birqatar is-sharalar ótkizý josparlanyp otyr», - dedi Álıhan Smaıylov.
Premer-Mınıstrdiń atap ótýinshe, búgingi kúni Taraz qalasynda Sh.Murtazaǵa arnap ornatylatyn eskertkishtiń eskız jobalary Jambyl oblysy zıaly qaýym ókilderinen quralǵan arnaıy komısıada saralandy. Aldaǵy ýaqytta jobalar Qazaqstan Respýblıkasynyń Monýmenttik óner qurylystaryn ornatý jónindegi memlekettik komısıanyń qaraýyna joldanyp, zańnamada belgilengen tártipke sáıkes tıisti jumys júrgiziledi. Derekti fılm túsirý týraly sheshim «Kınematografıa týraly» Qazaqstan Respýblıkasy Zańyna sáıkes ýákiletti organ - Saraptama keńesiniń oń qorytyndysy jáne Ulttyq fılmderdi memlekettik qarjylyq qoldaý máseleleri jónindegi vedomstvoaralyq komısıanyń usynymy negizinde qabyldanady.
«Atalǵan másele boıynsha kınojobalardyń avtorlary tarapynan ashyq konkýrs arqyly usynys berilgen jaǵdaıda, «Ulttyq kınony qoldaý memlekettik ortalyǵy» komersıalyq emes aksıonerlik qoǵamy belgilengen tártipke sáıkes keńes pen komısıanyń qaraýyna jınaqtap engizedi. Ári qaraı másele zańnama aıasynda qarastyrylady. Sonymen qatar múddeli memlekettik organdarǵa Sh.Murtazanyń 90 jyldyq mereıtoıyn atap ótý jónindegi is-sharalar josparyn ázirleý jáne tıisti jumysty uıymdastyrý tapsyryldy», - dedi ol.