Táýligine KVI-diń 100-den 200-ge deıin jaǵdaıy tirkeledi.
Almaty qalasy sanıtarlyq-epıdemıologıalyq baqylaý departamenti basshysynyń orynbasary Qarlyǵash Ábdijabbarova brıfıń barysynda turǵyndardy Qurban aıt merekesi kezinde sanıtarlyq normalardy saqtaýǵa shaqyrdy, dep habarlaıdy Almaty-akshamy.kz.
Departament ókiliniń aıtýynsha, Almaty qalasyndaǵy epıdemıologıalyq jaǵdaı nasharlaı túsýde.
«Maýsym aıynda mamyrmen salystyrǵanda aýrý deńgeıi 6,3 esege artty (94-ten 595 jaǵdaıǵa deıin). Táýligine KVI-diń 100-den 200-ge deıin jaǵdaıy tirkeledi. Aǵymdaǵy jyldyń 3 shildesinen bastap DSM epıdemıologıalyq jaǵdaıdy baǵalaý matrısasynda qala «sary aımaqta» tur. 2022 jyldyń 6 aıynda qalada koronavırýs 55 441 adamnan, shildede 773 turǵynnan anyqtaldy», - deıdi Qarlyǵash Ábdijabbarova.
Spıkerdiń sózinshe, mundaı jaǵdaıda saqtyq sharalaryn umytýǵa bolmaıdy.
«Biz Qurban aıt merekesi kezinde qurbandyq shalý rásimderi ótetin jerlerde jáne meshitterde barlyq turǵyndarǵa maska taǵýdy usynamyz, ásirese adamdar kóp jınalatyn jabyq úı-jaılarda. Áleýmettik qashyqtyqty saqtaý, qoldy jıi jýý, adamdar kóp jınalatyn oryndarǵa barmaý mańyzdy», - dedi ol.
Sondaı-aq, epıdemıolog maldy avtokólikterden jáne jeke úı ıelikterinen satýǵa tyıym saldy.
«Mal soıýdy uıymdastyrý jáne mal satý veterınarıalyq qyzmettiń resmı veterınarıalyq-sanıtarıalyq qorytyndysyn alǵan soıý pýnktteri men alańdarda (veterınarıalyq qyzmet bekitken tizbege sáıkes soıý pýnktteri, aýdandardaǵy alańdar) júrgizilýi tıis. Mal soıý tek veterınarıalyq anyqtama bolǵan jaǵdaıda ǵana júrgizilýi kerek», - dedi spıker.