Qabyldanǵan sharalardyń nátıjesinde izdeýde júrgen tulǵa ustaldy.
Bas prokýratýra taratqan aqparatqa súıensek, kúdikti qylmys jasaǵannan keıin qylmystyq qýdalaý organynan boı tasalaǵan, sondyqtan oǵan halyqaralyq izdeý jarıalanǵan, dep habarlaıdy Almaty-akshamy.kz
Grýzıanyń ádilet mınıstrligi laýazymdyq quzyretin asyra paıdalanǵany jáne 50 mln teńgeden astam búdjet qarajatyn ysyrap qylǵany úshin kúdikti dep tanylǵan Taraz qalasy ákiminiń burynǵy orynbasaryn ustap berý týraly QR Bas prokýratýrasynyń suraýyn qanaǵattandyrdy.
"Grýzıalyq áriptestermen aradaǵy tyǵyz qarym-qatynastyń nátıjesinde búgin Bas prokýratýra, Sybaılas jemqorlyqqa qarsy is-qımyl agenttiginiń qyzmetkerleri Qazaqstan Respýblıkasy Syrtqy ister mınıstrliginiń kómegimen kúdiktini qylmystyq jaýapqa tartý úshin Qazaqstanǵan ákeldi" delingen QR Bas prokýratýrasynyń baspasóz qyzmeti taratqan aqparatta.
Ol Astana qalasynyń tergeý ızolátoryna qamaldy.
Joǵaryda kórsetilgen qylmystardy jasaǵany úshin oǵan 12 jylǵa deıin bas bostandyǵynan aıyrý jazasy taǵaıyndalýy múmkin.
Halyqaralyq izdeýde júrgen Taraz qalasy ákiminiń burynǵy orynbasary Qaısar Sarytaı Grýzıadan ekstradısıalanatyny 2021 jyldyń jeltoqsanynda belgili boldy. Keıin QR Sybaılas jemqorlyqqa qarsy is-qımyl agenttigi onyń Grýzıa aýmaǵynda ustalyp, qamaýǵa alynǵanyn habarlady.