Erbolat Tólepbaı «Umaı ana» kartınasyn satýdan túsken 10 mln teńgeni Túrkıaǵa aýdardy
Tanymal sýretshi Erbolat Tólepbaı «Umaı ana» kartınasyn satýdan túsken 10 mln teńgeni Túrkıadaǵy jer silkinisinen zardap shekkenderge aýdardy, dep habarlaıdy Almaty-akshamy.kz. QazAqparatqa silteme jasap.
Aıta keterligi, sýretshi Túrkıadaǵy apattan keıin «Qazaq óneriniń Túrkıaǵa kómegi» aksıasyna uıytqy bolyp, zerger, sýretshi, ánshi, akter, aqyn, jazýshy sıaqty mádenıet jáne óner aıdynynda júrgen barsha áriptesterin is-sharaǵa belsendi atsalysýǵa shaqyrǵan bolatyn.
«Jarıalanǵan úndeýden keıin aýksıon máselesimen aınalystym. Úlken aýksıondy kútkenshe birshama ýaqyt ótedi. Al qazirgideı qıyn kezeńde Túrkıa tarapy qyrýar qarajatqa muqtaj. Sol sebepti jedel aýksıon uıymdastyrdym. Oǵan negizinen Qanat Tólemetov bastaǵan bes jigit atsalysty. Rústem Qaraev, Erjan Omarov, Vıtalıı Kım, Azamat Syrǵabaev sekildi atymtaı jomarttar bul usynysty qostady», - deıdi ErbolatTólepbaı.
Sýretshi aýksıonǵa «Umaı ana» kartınasyn qoıǵan soń, ony joǵarydaǵy esimderi atalǵan bes jigit birigip, 10 mln teńgege satyp alǵan.
«Bul óte sapaly salynǵan birtýar shyǵarmamnyń biri edi. Atymtaı jomart bes jigit qosylyp, aýksıon kezinde kartınany 10 mıllıon teńgege baǵalady. Olar aqyldasa kele, shyǵarmany da Túrkıa tarapyna syılyq retinde tapsyrýǵa sheshim qabyldady. Sodan Túrkıanyń Almatydaǵy Bas konsýldyǵyna baryp, 10 mıllıon teńgeni Túrkıadaǵy apattan zardap shekken baýyrlarymyzǵa kómek retinde aýdardyq. «Umaı ana» kartınasyn da tabystadyq», - dedi ol.
