Meniń ata-babam Grýzıanyń Túrkıa shekarasyna jaqyn Aspınzk aýdanyndaǵy Gesýnda degen aýylda turypty. Anamnyń aıtýynsha, St alınniń buıryǵymen 1944 jyly 14 qarashada Qazaqstanǵa 86 myń túrik deportasıalanǵan eken.
21 kún degende qazaq jerine jetken. Biraq sol aralyqta 17 myń qandasymyzdan aıyrylyppyz. «Aýyldy soldattar qorshap alyp, jınalýǵa 15– 20 mınýt ýaqyt berdi. Sóıtip, búkil aýyl qarýdyń kúshimen mal tasıtyn vagondarǵa tıeldik. Qaı jaqqa bara jatqanymyzdy da bilmeımiz. Qaqaǵan qys. Vagonnyń ishi tastaı sýyq. Tońǵan, ábden ashyqqan myńdaǵan adam jol ústinde qaıtys boldy. Máıitterdi jol boıyna tastap otyrdy.
Sóıtip, qanshama qandasymyz japan dalada kómýsiz qaldy. Eń qorqynyshtysy, vagonnyń bir shetinde adam ólip jatsa, ekinshi bir buryshynda ómirge bala kelip jatatyn. Qajettilikterin de sol vagon ishinde óteıtin.
Eger sol kezde bizdi qazaqtar baýyryna baspaǵanda, ólip keter edik... Sadaǵań keteıin, qazaq halqy...» dep ata-anamyzǵa aıtyp otyrady eken. Tarıh kýágerleri búginde joq ta shyǵar. Biz sol kezdegi babalar ómiri jaıynda ata-anamyzdan tyńdap óstik.
Málimetterge súıensek, sol kezde túrikterdi Sibirge de jer aýdarǵan eken. Biraq ol jaqqa barǵandardyń birde-bireýi tiri qalmaǵan. Anam da «búgingideı beıbit zamanda bilim alyp, ósip-ónip otyrǵanymyz tek qazaq halqynyń arqasy. Sol úshin de biz darhan eldiń jaqsylyǵyn eshqashan umytpaýymyz kerek» dep jıi aıtady.
Qazaqstan – biz úshin qutty meken. Óıtkeni, biz túrik halqy, munda barlyq ulttar men ulystar sekildi ózimizdiń salt- dástúrimizdi, mádenıetimizdi, tilimizdi damyta otyryp, tatý- tátti ómir súrip jatyrmyz. Sondyqtan qazaq ultyna, onyń tiline degen qurmetimiz de bólek. Qazir balalarymyz Elıf pen Súleıman qazaq mektebine barady. Otbasymyzben qazaq tilinde erkin sóılese alamyz. Osyndaı yntymaǵy men birligi jarasqan elde ómir súrýdiń ózi bir baqyt dep bilemin. Men búgin ata-babamyzdy baýyryna basyp, bir úzim nanyn bólisken keń peıildi qazaq eline otbasymyzdyń atynan shyn júrekten alǵys aıtamyn! Mereke qutty bolsyn!